鬼祟惹人懷疑

正所謂「唔怕神一樣嘅對手,最怕豬一樣嘅隊友。」呢句說話真係相當有道理,早前武漢有個招嫖卡片集團搵咗個懵仔派卡片,結果因為對方派到去派出所而變成自投羅網,搞到成個卡片集團成為當地警方重點搜查對象。對色情卡片黨嚟講,搵個叻仔去派卡片固然重要,仲要搵啲身家清白嘅人幫手,咁先至唔會惹禍上身。事情又係喺武漢發生,話說江夏大橋派出所民警收到轄區一間酒店嘅經理報案,話發現有人喺酒店內派發招嫖卡片,於是民警即時抵達現場,見到有名男子鬼鬼祟祟掉頭跑,立即上前截查對方,結果喺呢位26歲王姓男子身上搜到40張招嫖卡片,及後再將王男嘅同黨兼同鄉逮獲,並喺電單車尾箱搜獲招嫖卡片960張,民警更發現王男竟然係一宗販毒案嘅通緝犯。據王男稱,喺事發前兩日,佢喺手機社交應用程式上結識一名男子,對方表示只要幫佢派發招嫖卡片,每日便可獲得200至300元人民幣報酬。可能因為佢身有屎,所以喺酒店一見到民警時便即刻逃走,以致引起警方嘅懷疑。

撰文:魂