前MMA格鬥選手Jon Koppenhaver，又名War Machine喺今個月初被美國內華達州法院定罪，判入獄36年，即係話佢出返嚟都71歲囉！佢係邊個？咪就係喺2014年將脫星女友Christy Mack打到鼻骨同肋骨爆裂，連門牙都打甩埋嘅衰人囉，阿妹執得番條命都算好彩，經過長時間治療及休養，Christy Mack喺舊年作有限度復出，拍吓寫真及去夜場做騷，但對比當年索爆外形，如今阿妹已走晒樣，粉絲都替佢心痛！
身體上嘅痛楚可以痊愈，但心理上嘅痛睇怕跟足Christy Mack一世喇！阿妹喺康復過程中每次接受傳媒訪問提到受襲經過都喊到收唔到聲，佢仲話經常發噩夢，好擔心War Machine會搵佢尋仇，事件發生至今都未能過正常生活。有指喺判刑當日，Christy Mack喺法庭內流淚滿面表示擔心War Machine出獄後會殺害自己，睇嚟阿妹要真正康復仲有一條好漫長嘅路要走呀。不少網友就好輕鬆咁話時間會淡忘一切，但細佬可以肯定冇可能，皆因阿妹一日喺幕前工作，一日都仲有人舊事重提，就好似喺未宣判前，已經有網友喺Christy Mack社交網留言鬧爆佢毀咗前男友一生，正所謂人言可畏，Christy Mack想有安樂日子過都好難呀！
撰文：祖