鹹古同情慾小說嘅最大分別，就係後者更着重故事嘅結構，鹽花床戰反而係推動劇情發展元素之一。如果想睇高質素嘅情慾小說，呢本由美國小說家帕蜜拉．克萊兒（Pamela Clare）所著嘅《非法臥底》（Hard Evidence），相信可以為大家帶嚟一段懸疑又刺激嘅文字體驗。本身係專欄作家兼記者嘅帕蜜拉，曾經獲得多個新聞獎項，更著有多本情慾小說，而《非法臥底》就係佢其中一本人氣代表作。小說以一宗神秘槍殺案開始，跟住卻發展成令人面紅耳熱嘅情慾愛情故事，點知最後竟然變成情慾交纏嘅驚慄動作小說。高潮迭起又令人意料不到嘅劇情，帶畀人喜出望外嘅感覺。
故事講述女主角泰莎係個勇敢又有正義感嘅記者，有日目睹一宗兇殺案發生。急駛轎車嘅刺耳聲、子彈擊碎玻璃聲，以及女孩嘅淒厲叫聲，泰莎面對躺於血泊中女孩嘅空洞雙眼，佢第一時間嘅反應係問自己：「十幾歲嘅女孩點解會遭到槍殺？」呢個時候，佢見到企喺封鎖線外嘅皮衣男子正盯住自己！感到事情相當有可疑嘅泰莎，決心重回街頭搵出槍殺案嘅真相，並打算喺報紙上揭發一切。那邊廂嘅皮衣男子原來叫朱利安，從事臥底工作嘅佢，從未有人知道佢嘅真面目，卻估唔到竟然有記者會揭露兇案細節，破壞咗佢多年嘅計劃，仲引嚟危險嘅對手暗殺所有案件中嘅目擊者。
朱利安決定要搵出呢個愚蠢嘅記者，要脅佢唔好再有動作，卻估唔到自己竟同泰莎發展出感情。情慾關係過後，究竟兩人會否選擇相信對方，並共同揭開黑幕呢？
書名：《非法臥底》（Hard Evidence）
售價：約HK$110
撰文：魂