呢期外國男士興着喱士衫，究竟係型定騎呢？唉，潮流嘅嘢真係識條鐵咩！日本AV締取官宣布落實，遲啲可能冇AV睇，對AV迷嚟講絕對係個壞消息！
喺好多男士嘅眼中，喱士係女人嘅專利，好似喱士胸圍、喱士底褲、喱士裙等，喱士不但令衣物變得美觀，更增添女人味。不過如果換上男士着喱士衣物嘅話，唔知大家又點睇呢？最近網上熱議一套由美國品牌Hologram City推出嘅喱士男裝，呢套男裝嘅設計概念係根據恤衫加短西褲，由於佢「透氣」性相當強，故此聲稱最適合夏天穿着。為咗配合夏天嘅主題，顏色亦相當繽紛，有淺藍、紫、黃、粉紅等任君選擇，不過呢啲顏色咁搶，未必個個接受。至於着呢套衫時，大家要留意嘅係條褲透視感極強兼冇內膽，穿着時最好着番條白底，否則會畀人睇晒！大家唔好以為呢套男裝冇人問津，售價50美元有找嘅佢，不知有幾多客人訂購，所以話品味嘅嘢大家識咩吖！話說回來，其實男士唔應該視喱士為女士嘅衣着專利，皆因早喺15世紀，喱士主要用喺男裝上，16世紀時喺西歐廣泛流傳並逐漸盛行，換句話講，其實最早着喱士嘅其實係男人。
有邊個男人冇睇過日本AV先？佢好睇嘅地方，在於女優夠靚、床戰精彩同題材夠多。不過日本AV業自由嘅日子可能從此不再，事關早前日本政府宣布落實喺全國嘅都道府縣警設立「アダルトビデオ出演強要問題專門官」（強迫演出成人作品問題專門調查官），簡稱「AV取締官」。其實關於強迫女性演出AV嘅問題，喺日本早已有討論，經常有女性投訴遭到欺騙、誘拐、暴力等，而被迫拍攝AV，至今已累積投訴過百宗，加上去年3月日本有國際人權組織舉辦大型控訴會，指出有女性被迫簽下演出合約，結果因為被黑道威脅或背負巨額違約金，有人選擇自殺，令社會對呢個問題更為關注。另一方面，有人認為因為東京奧運舉辦日子臨近，為咗改善日本嘅國際形象，改變AV界生態亦係意料之內。至於「AV取締官」嘅工作係做乜嘅呢？顧名思義，佢哋嘅工作係針對AV公司及業界人士進行調查同搜證工作。不過對於「AV取締官」嘅入職要求，雖然日本政府仲未有決定，但社會普遍認為必須熟悉AV界運作及幕後嘅人士擔任，而且具有強大嘅搜集情報能力，兼且有不畏黑勢力嘅勇氣。其實對於業界嚟講，為免捲入日後同女優間嘅糾紛，唔少AV片廠喺簽約時都會將面談及合同內容拍攝落嚟作為記錄。
撰文：魂