唔少男女都有自娛習慣，而自娛嘅方法卻不盡相同，不過有一個共通點，就係過程中會諗起前度。另外，有調查發現男女喺上床嘅時候，雙方最需要嘅係前戲。至於前戲做乜好？其中一個動作就一定係錫錫喇！但係第一次錫錫可能會大為緊張，繼而導致失敗收場！
人最大嘅缺點就係太有記性，正因為記性太好，成日都會記住往日嘅失敗，而令人念念不忘嘅相信係感情上嘅失敗喇。幸好小弟記性一向都唔係太好，就算今次溝女唔成功，被欺騙完感情之後好快忘記，第二日繼續喺感情上追追逐逐。不過好多人卻相反，就連自娛嘅時候亦會諗起前度。早前一個情趣用品銷售網就以男女自娛習慣進行調查，搵來4,500名男女協助。男士方面，有65%表示經常自娛，30%間唔中會自娛，至於唔會自娛嘅就有5%，真係忍得手喎！至於女士方面，經常自娛嘅有58%、間唔中自娛者有35%，冇自娛過嘅則有7%。咁男同女自娛時會諗啲乜呢？大部分受訪男女都表示自娛時會諗起前度，諗諗吓又唔出奇，如果現時嘅伴侶可以滿足到佢哋嘅性需要，咁就唔使靠自己啦！係咪？
好多女性都話男伴喺上床嘅時候無情趣，喺埋牙之前鮮有進行一連串調情動作，前戲時間亦相當短，甚至唔做前戲就即刻「入閘」。喺缺乏熱身同滋潤之下交歡，加上好多調查都顯示女性需要適當前戲刺激，先可以增加交歡時達到高潮嘅機會，故男方唔做前戲大致上都會令女方不滿，甚至不適。小弟相信唔肯做前戲嘅男人只屬小數目，事實上男人都好需要亦注重前戲，有調查都係咁講！最近外國有調查訪問咗唔少成年男女，問佢哋喺一段兩性關係當中最想增加邊一方面嘅分量，女性嘅回覆頭三位分別係前戲、錫錫同埋高潮次數，睇嚟喺女性心目中，前戲比高潮更加重要，平常唔鍾意做前戲嘅男士睇完之後要認真檢討一下喇。至於男士方面，頭三位分別係前戲、吹奏及錫錫，女士們如果想取悅男伴的話就請多啲為對方「落嘴頭」喇。
記得小弟第一份工作係辦公室助理，亦即係打雜，第一日返工就有位前輩教我點做，教咗唔夠一個鐘頭佢就去咗歎茶，作為一個新人面對咁多工作，當然顯得手忙腳亂啦！而另一個好心地嘅前輩就同我講：「細佬！唔使慌，最緊要定。」然後教我將工作分類好緩急輕重，再逐樣完成。事實上，冷靜除咗喺職場上有用，喺情場上以至床上亦好有用。最近日本「網站Menjoy!」綜合咗唔少上床失敗事件，當中好多都係喺接吻時出事！至於接吻出錯其中一個大原因正係太緊張喇！有受訪者表示自己太緊張，搞到成個身硬晒，愈想趨前錫女仔個嘴卻發覺愈難移動，久久都未能夠錫到對方，搞到女仔嬲嬲豬離場。第二個原因就係太興奮，有人表示面對第一次接吻時，呼吸急促，貼近女方嘅時候鼻孔係咁往女方噴氣，一來令女方覺得核突，二來噴氣聲打亂晒當時嘅浪漫氣氛。第三係有口氣，失敗者本身未必有口臭問題，但係接吻之前就有飲酒同進食引致口氣嘅食物，到錫錫嘅時候咪出事囉！
撰文：賢