以前評論一位人見人愛嘅模特兒，必要條件一定係要有一副迷人嘅樣貌，同埋令人流晒口水嘅火辣身材。不過時至今日，如果想喺模特兒界出人頭地嘅話，僅憑靚樣同身材係唔夠。好似南韓人氣模特兒張仁英咁，佢唔單止擁有火辣身材，一把靚聲更係迷倒唔少男士。
喺南韓首爾出生嘅張仁英，活潑可人嘅形象固然令佢更易打動到男士嘅心，加上甜美嘅樣貌及火辣身材，更被男士視為心目中嘅女神。不過佢當初並未諗過會以模特兒作為自己嘅事業，反而希望朝住娛樂圈方向發展。既然係咁，點解佢又會投身呢個行業呢？一切就要從佢嘅朋友開始。話說當年佢有個從事攝影工作嘅朋友，因為要拍攝一輯寫真關係，於是搵佢幫忙客串做模特兒。不過連佢自己都估唔到，呢輯相竟然被模特兒公司睇中，於是斟佢做模特兒，結果佢喺2007年開始咗平面模特兒嘅工作。一直以嚟做事相當認真嘅佢，當時心諗既然已經成為模特兒界一分子，就要諗吓點樣可以令自己做得更好，而呢個時候咁啱舉辦首屆賽車女郎大賽，喺公司嘅推薦下，佢決定參加呢個比賽，一來可以提升自己嘅實力，另一方面又可以增加知名度，結果佢喺比賽中獲得最佳美容專線獎，同時又憑住亮麗嘅外形，以及大方得體嘅表現，成功令人氣急升。自呢次比賽後，佢嘅發展一日千里，除咗多咗平面廣告嘅拍攝機會外，佢又化身成車模喺各個大型車展中亮相，氣質高貴嘅佢，不但成為車展上亮眼嘅一點，而且讓更多人認識佢，其後佢又擔任賽車女郎，以性感迷人嘅造型，觸動唔少男士嘅心。
正當佢發展順利時，突然減少工作量，唔通佢諗住退出模特兒界？原來係事務所覺得，佢嘅聲線相當唔錯，加上當時有唔少車模踩入樂壇關係，所以着力培訓佢歌唱同舞蹈技巧。起初佢對自己嘅實力並無信心，經過一番訓練後，發現自己好似有一定嘅天賦，於是埋首喺歌唱嘅訓練之餘，同時學習作曲。佢話喺呢段時間，自己好似着咗魔咁迷上音符，希望能夠創作出動人嘅音樂。不過由於缺乏時間關係，故此佢只好打消念頭，專注喺唱歌鍛煉之中。須知道訓練過程相當嚴苛，而佢又要繼續模特兒嘅工作，佢回想當年呢段時間，生活真係既艱苦又充實。及至2012年時，佢同另外幾位模特兒組成模特兒團體正式喺樂壇出道，憑住亮麗嘅外形，佢哋獲得有相當嘅人氣，演出機會亦相當多。不過當時嘅佢既因為自己嘅發展路線變得廣闊而開心，卻又因為私人時間變得愈嚟愈少而煩惱，因而令情緒變得容易緊張。正當面臨壓力爆煲之際，佢發現原來放鬆心情咁唱歌，有減壓嘅效果，因此每當有時間就會同埋一班朋友去唱歌，藉此減壓之餘，最令佢諗唔到嘅係，放鬆心情後佢嘅歌藝竟然有進步。雖然後嚟為咗令生活更加平衡，因此專注於模特兒工作，但佢對於呢段日子仍念念不忘，希望未來有日能夠喺樂壇再次發光發熱。
簡介：迷人嘅外形固然能夠輕易成為男士嘅焦點，加埋一把甜美嘅聲線，更有畫龍點睛嘅作用，而有齊上述優點嘅張仁英，試問又點可能唔成為男士心目中嘅寵兒呢？雖然佢家陣專注喺模特兒工作，但仍然希望終有一日，能夠再次聽到佢嘅新歌。大家想知道阿妹嘅最近動向，就要緊貼佢嘅IG喇！
網址：https://www.instagram.com/zzang.zzang_v/
出生地：首爾
身高：170cm
三圍：35、24、35
撰文：魂