床上論高潮西班牙女奪冠

每個國家嘅人民性生活習慣不同,有一個調查發現若論女人喺床上得到多重高潮嘅比率,以西班牙女最高!想喺床上令女伴達到高潮,當然要講技巧啦,至於有咩技巧係令女方唔鍾意呢?有專家表示唔一定每次床戰都要以達到高潮為目標,咁做反而會令男女雙方徒添壓力,睇嚟大家嘅性觀念應該要改變一下喇。

獲5次高潮

過往幾年都有唔少調查顯示出香港人嘅性生活數量同質素都欠佳,咁又唔出奇嘅,香港人每日都要面對來自各方面嘅壓力,仲要由朝做到晚,返到屋企又點會想做愛呢?就算想,精神同體力唔夠,又點會做得出好質素來呢?咁全世界又有邊一個地方嘅性生活質素稱冠呢?若然以女性嚟計,相信一定係西班牙喇!早前一個名為Victoria Milan嘅約會網站,透過問卷訪問咗15個不同國家嘅5,971名成年女性,以了解佢哋喺床上達到多重高潮嘅比率,結果發現西班牙女性當中有94%試過,其次係比利時有90.9%、美國有89.7%、法國有87.5%,至於波蘭有50%位列15個國家當中最尾位置。而眾多受訪女性當中,有高達46.4%曾經試過喺一次床戰當中獲得逾5次高潮,高潮3次嘅亦有17.2%。好彩香港並未喺受訪國家當中,否則好可能敬陪末席,幫波蘭墊底喇。

切忌急進

男人性急,亦相當急色,一見到心儀對象,就好想快快將對方帶上床,上到床亦想快快提槍上陣,享受抽送帶來嘅快感。之不過,又有冇考慮過女方嘅感受呢?新聞資訊網站早前進行過一系列女性床上喜好嘅調查,了解一下佢哋對男性嘅床上錯誤行為有咩睇法。當中不少網站女用戶表示不滿嘅行為,其中一個就係太快進入喇!有女性表示男方完全唔做前戲之下進入,往往會令女方唔夠分泌而感到痛楚。另外亦有意見表示最怕男方用手指亂咁撩撥小妹妹,男人咁做會令佢哋覺得自己好似一隻被填塞餡料嘅火雞一樣!亦有女用戶表示希望每次床戰之前,男方都可以預先準備好紙巾以便喺事後清潔,因為女性都希望喺床戰之後保持乾淨,及同男方相擁一刻,唔希望男方急急腳落床走去浴室沖涼,大家記住喇!

目標非本源

好多年前,政府宣傳教育政策嘅時候,用到「求學不是求分數」作為口號,當時小弟聽到之後真係覺得得啖笑,先唔好講話學校放棄從考試錄得嘅分數而評核學生成績係難以實行啦,投考政府職位都要睇分數啦!政府自己都未能夠做到唔睇考試分數而取錄員工,你又點期望學校做得到呀!大家話係咪搞笑先?喺求學以及其他考核當中以取得高分數為目標的確係重要,但係喺上床方面,就唔一定要達到高潮為目標喇!最近有性治療師表示絕大部分人都以獲得高潮為上床嘅目標,稱之為「高潮命令」,因為咁令兩性關係帶來重大壓力,令床戰變成唔係一種享受而係一種目的,長久下去只會破壞彼此嘅關係。所以治療師建議大家進行床戰嘅時候盡量放鬆,彼此有冇高潮唔重要,享受過程中嘅溫馨同甜蜜就已經足夠。

撰文:賢