雖然話結婚係男人嘅墳墓，但係唔少男人對婚後生活抱有憧憬，同至愛過住幸福快樂嘅生活。如果你都係其中一分子嘅話，呢隻由日本十八禁遊戲公司Hibiki Works最新推出嘅作品《新妻 LOVELY × CATION》，相信可以滿足到你。遊戲有趣嘅地方，就係以玩家第一身飾演嘅主人公，從拍拖一直玩到結婚，再度過婚後生活為止。故事中嘅主人公自畢業至今已有一年嘅時間，工作不但順風順水，而跟同事之間嘅關係亦相處得相當好。面對事業上嘅美滿，主人公開始對未來嘅生活充滿憧憬。呢個時候突然收到親友嘅結婚請帖，一個從來未諗過嘅想法湧上心頭，就係：「有朝一日，我都會結婚啩？」為咗可以將呢日變成真實，主人公決定努力把握幸福，喺工作之餘仲要搵到另一半。不過面對3位各有優點嘅女角色，究竟邊個先至係可以互相扶持嘅對象呢？呢隻遊戲唔單止有鹽花場面，內容更係甜到漏，即係溫馨兼愛意滿瀉，有興趣嘅話不妨試吓佢個試玩版，睇吓自己會唔會有糖分過高嘅反應。