唔知大家知唔知命呢？有研究話相信命運嘅人喺床上滿足度更高。年少輕狂，想做就去做，但有調查發現年輕人比成熟人士更做足安全措施。提到上床，好多男人都會搞吓新意思，同女伴嘗試新玩意，原來有3種玩法係會令女伴嬲嬲豬，大家千祈唔好試喇！
「不信命，只信雙手去打拚」呢兩句《有誰共鳴》歌詞相信大家都好熟悉喇！而提到命運，大家又有咩睇法呢？小弟後生嘅時候都唔信，但係家陣就十分認命，認定自己係天煞孤星、無伴終老、孤獨一生喇！早前多倫多大學和達爾豪西大學進行一項研究，發現人類對命運嘅相信度愈強，床上滿足度就愈高，仲稱呢種為「性命運信念」。研究負責人指出，如果男女雙方都相信命運，就會趨向認定對方係命中伴侶，更加樂於喺床上作出配合，繼而形成「性命運信念」，呢種信念愈強，就算面對難關，好似性慾下降或者男方出現早洩問題，亦會咬緊牙關去搵辦法解決同克服，仲會樂於嘗試多種不同玩法，性生活自然更滿足。至於點樣提高「性命運信念」呢？負責人話好簡單，就係多溝通喇！
以前細個唔知咩叫做危險，去沙灘游水見到捲起大浪都照樣落水，明知有機會被老師同風紀搜書包，都一樣照帶鹹書同同學仔分享。而年紀漸大，危機意識提高，家陣已經好少做危險動作，特別係上床嘅時候每次都會使用安全套至會做愛做的事，一來怕感染性病，二來怕搞出人命。不過，早前有一個外國調查顯示，年長男士唔及年輕人咁注重安全！喺18至24歲嘅受訪男士當中，有過半數會喺上床嘅時候使用安全套，但係年齡介乎25至34歲嘅男士則只有3成使用安全套，原因係佢哋性經驗豐富，亦恃住有經驗，所以自以為打真軍亦冇咁易中招。而一個名為Superdrug嘅網上醫療資訊網站訪問咗2,000名成年人，發現美國男人有65%上床唔用使安全套，至於歐洲人亦有55%鍾意打真軍，睇嚟安全套品牌不妨好好考慮開發一下呢兩個市場，提升營業額兼保障當地人嘅健康喇！
相信唔少人都受到情色小說及電影《格雷的五十道色戒》嘅影響，希望同伴侶模仿當中嘅男女主角嘗試愉虐玩意。之不過，男士們當然樂於一試，但女伴又係咪樂在其中呢？早前日本網站「Menjoy!」訪問咗唔少女性，睇吓佢哋最怕邊種愉虐玩法，結果係用膠條或膠紙綁起雙手玩拘束交歡！點解呢？有受訪女性話雙手被綁實令佢哋產生不安感，仲有玩完之後被緊緊綁住嘅身體部分會紅晒，甚至出現過敏反應，影響外觀，咁又難怪佢哋唔鍾意嘅！至於第二樣就係用雪條刺激，有受訪女士話男方唔知條雪條真係好凍，凍得耐仲會產生刺痛感覺，而且玩完之後搞到床單濕晒，亦令佢哋覺得不快。第三係用牙籤刺激，受訪女士表示男人通常唔識控制力度，唔小心刺痛女方，仲誤以為女方覺得興奮而自鳴得意，實在討厭！
撰文：賢