上位靠「妹」力?

正所謂「成功靠父幹」,只要父親身家夠厚,作為子女就已經係成功人士喇!而喺日本藝能界,亦有靠父蔭或母蔭而成功嘅例子,最近更有人靠妹妹博上位添!佢就係寫真女郎新井優子,現正式改名為有村藍里,仲話會抱住覺悟以及背水一戰嘅決心進軍藝能界!

用番真名

咦?姓有村?唔通佢同人氣高企嘅24歲美少女偶像女星有村架純有關?大家估得冇錯!有村藍里正正就係有村架純嘅親生姐姐。而有村架純可以話係藝能界新貴,有佢演出嘅電視劇,8套當中有7套收視高達百分之二十,簡直係電視台收視福將。

前年,新井優子被傳媒報道係有村架純嘅姐姐之後,已經有好多人話優子撈極都唔紅,想借妹妹嘅名氣上位!最近優子用番真名有村藍里拍寫真,而喺5月就會推出同名寫真集《有村藍里》,當中會作出幕前首次全裸演出!雖然所謂嘅全裸係三點不露,三點都會刻意遮住,但係亦極盡官能刺激,兼且引起大家廣泛討論,加上用番真名就嚟一次咁激嘅演出,令借妹妹上位嘅爭議聲進一步增強。

斷絕關係?

翻查資料,歷來亦有唔少類似例子,好似當年中森明菜嘅妹妹中森明穗走去拍火辣寫真,而有鑑於中森明菜所屬事務所對於明穗食住明菜嘅名氣上位嘅做法大感不滿,因而令中森明菜受到唔少壓力,最後兩姊妹仲斷絕關係添!故有人估計有村藍里改名之後,好大機會為佢同有村架純嘅姊妹情,埋下斷絕關係嘅伏線!

撰文:賢