捉不透摸不清嘅女人，加上迷人外形同身材，對男士嚟講零舍有吸引力。不過女人要做到呢點卻又相當難，皆因只要偏差少少，就會令人覺得太高竇，俗啲嚟講即係吊高嚟賣。不過南韓模特兒許貞賢，的確做到神秘得嚟又迷人，難怪男人見到佢都冧到暈！
出生於南韓首爾嘅許貞賢，論外形絕對冇得彈，唔單止樣貌俏麗，身材更係玲瓏浮凸，加埋一對修長美腿，具備迷倒男人應有嘅條件。不過阿妹能夠喺眾多養眼模特兒之中脫穎而出，單憑外在美絕對唔夠，最重要係佢散發出一股溫婉得嚟又優雅嘅氣質，令男人為之心動。貞賢初出道時從事模特兒工作，經常喺汽車雜誌及網站亮相，由於佢氣質迷人，好快就備受注目，2009年係佢首次以車模身份示人，如此內外兼備嘅車模，呢次處女演出獲得好評，自此之後車模工作接踵而來，不但喺釜山車展表演，其後更化身賽車女郎喺南韓賽事中登場。經常成為鏡頭焦點嘅佢，表現得大方得體，親切嘅笑容更被喻為最暖心嘅車模。而佢有別於其他模特兒，走紅之後就會踩入網絡直播平台，或者走去拍廣告，反而一直專注於模特兒工作，雖然咁做唔能夠增加收入，不過佢覺得無所謂，繼續默默耕耘工作。
用默默耕耘嚟形容許貞賢真係一啲都冇錯，因為關於佢嘅資料確實少之又少，唔單止係個人資料，就連生活近況亦鮮有提及。點解佢會咁低調，甚至連開設個人博客、Insatgram或Twitter嘅社交網都冇呢？據阿妹解釋，認為模特兒應該有別於藝人，而重點在於分享私生活上，藝人要讓更多人認識自己，呢點絕對無可厚非，只係作為一位模特兒，佢認為唔需要將私生活同大家分享，亦應該保留番一啲私人空間畀自己，否則會令佢覺得好冇安全感。如果係其他模特兒咁講嘅話，一定會畀網民給予「負皮」，不過換轉係呢位公認嘅暖系索模嘅話，情況就唔同，事關大家都覺得好應該畀更多私人空間佢，甚至有人話帶有神秘感嘅許貞賢更加吸引。至於平時佢最鍾意做乜嘢呢？相信冇人會估到，就係匿喺屋企打機，而當佢投入玩一款遊戲時，甚至會廢寢忘餐地打足幾日幾夜。機迷同氣質女神，感覺好似大纜都扯唔埋喎！
簡介：身形高挑嘅許貞賢，不但擁有標致嘅五官，連身材都係咁養眼，相當吸引，再配合埋溫婉可人，兼且溫暖人心嘅笑容，相信冇男士唔會畀佢打動。而生活低調嘅佢，予人一種神秘感，對於充滿好奇嘅男士嚟講，非常引人入「性」。如果想了解阿妹多啲，可以Click入呢個網站睇睇。
網址：http://cafe.daum.net/lovelyhjh
出生地：首爾
身高：173cm
三圍：34、24、34
撰文：魂