雖然成熟女性嗰陣女人味，真係好易令男人心動，但有時又覺得凡事看透嘅佢哋，總係欠缺活潑，唔及可愛嘅萌系女生咁吸引。諗諗吓，男人真係幾煩，又要呢樣又要嗰樣，如果個個女人都好似韓國人氣車模蔡時雅咁，冷艷又得扮萌亦得，你話幾好呢？
出生於韓國首爾嘅蔡時雅，今時今日已貴為人氣車模兼模特兒，但係初出道時冇乜人睇好佢，事關當時佢塊面有啲嬰兒肥，身材略嫌豐滿，由於當時車模界流行冷艷風格，故此外形可愛嘅佢，仍要跟隨主流走冷艷路線，結果變得兩面唔討好，所以2010年首次喺車展上以賽車女郎身份登場時，外界反應相當差，令佢非常傷心。不過正正係因為初出道唔係一帆風順，令佢同模特兒經理人公司反思，以後應該行乜嘢風格路線，結果大家一致認為走可愛風係最適合佢嘅形象。與此同時，佢努力做運動，希望以更Fit嘅身形吸引大家嘅眼睛。事實證明佢同經理人公司嘅努力並無白費，皆因佢喺同年另一個車展演出時，憑住火辣身材以及萌爆造型，成為全場焦點，之後佢嘅照片喺網上瘋傳，人氣極速上升，其後佢被一支賽車隊伍睇中，成為車隊嘅專屬賽車女郎。成功突圍嘅時雅，決定再次挑戰冷艷造型，不但作為自己實力嘅肯定，更希望能夠跨過自己內心呢道障礙，而憑住大勇狀態，加上豐富演出經驗，成功脫胎換骨，冷艷形象備受歡迎，令佢變得更加自信。
隨住喺車模界發展順利，時雅亦好似其他車模咁，朝住模特兒界發展，並先後為多本時裝及潮流雜誌拍攝寫真，亦喺多個商品展銷會上登場。不過正當佢喺車模界發展如日中天之際，卻喺2013年突然宣布休息。據稱，由於佢工作不斷，令心理同身體承受極大壓力，最重要係冇時間陪屋企人，於是佢決定放一個長假。休息咗一年之後，佢重新出發，雖然闊別車模界一段時間，但充足電嘅佢，復出可以話係零障礙，不但又再成為車隊嘅專屬賽車女郎，更喺多本雜誌及網絡媒體拍攝寫真，佢萌得令人心動嘅氣質，再次成功打動大家嘅心。時雅表示喺休息嘅日子中，並非過住吃睡嘅生活，反而趁呢段時間同屋企人去旅行，並且努力進修，令佢嘅思想同眼界擴闊咗唔少，因此復出工作時可謂駕輕就熟，亦知道應該用乜嘢方法嚟表現自己。問到佢幾時再次以冷艷形象亮相，佢笑稱呢點要配合番活動主題，如果有需要嘅話，佢唔介意再次化身成冰山女神示人。
簡介：蔡時雅最迷人嘅地方，在於萌味爆棚嘅同時，卻又可以化身成冷艷女模，配合玲瓏浮凸嘅身材，實在令人心動不已。不過佢最討人喜歡嘅地方，係佢對屋企人嘅關懷，如此一位既有外貌又有氣質，性格又貼心嘅索模，試問又點可能唔成為大家心目中嘅女神呢？如果想了解阿妹多啲，就Click上佢嘅IG睇睇喇！
網址：https://www.instagram.com/sia_chae/
出生地：首爾
身高：170cm
三圍：34、23、34
撰文：魂