男人唔補好易冇

女人唔補好易老,男人唔補好易冇。大家咪以為呢種講法好誇張喎,皆因俗語都有話男人唔滾唔知身體好,滾得太多卻好易搞到乜都虧。既然男人要着重保健,又有乜書可以作為參考呢?呢本由內地養生專家張衛東,同多本養生作品作家陶紅亮聯手著作嘅《男人保健聖經》,相信可以畀到各位男士保健上嘅參考。張衞東以自身專業嘅養生角度出發,為男士帶嚟各種養生方法,陶紅亮則點出男性健康並非個人問題,事關作為家庭棟樑嘅男人,更對親人及家庭有着舉足輕重嘅影響。雖然男士養生咁重要,但坊間關於男性養生嘅書籍卻係好似字海咁,對日理萬機嘅男士嚟講,又邊有咁多時時細閱呢?大家唔使擔心,因為作者會先從男性最常遇見,卻又最易忽略嘅保健問題入手,然後透過最簡單又最易做到嘅方法,等男士可以為自己制訂最合身嘅保健方案。例如:男性應點樣養成科學嘅生活方式、邊種生活方式同邊啲疾病有關聯、應該食邊啲五穀雜糧同埋點樣食、和諧性愛有邊啲要素等,書中都有詳細說明。雖然內容眾多,但憑住簡單又扼要嘅說明,即使對字海抱有先天性抗拒嘅男士,同樣可以睇得舒舒服服,一啲都唔難吸收。

書名:《男人保健聖經》

售價:約HK$75

撰文:魂