呢期有兩單新聞令人相當有感觸，一單係關於內地常平，眼見昔日燈紅酒綠，每到周末成為車水馬龍嘅繁華城鎮，今日變得相當蕭條，真係好感觸。另一單則係關於日本嘅「Premium Friday」，雖然唔多關我哋事，但係見到日本打工仔到咗每個月最後一個星期五，都有機會提早放工時，心諗點解我哋冇咁嘅福利呢？
曾經每到星期五晚，成班玩家就會北上衝關，一邊坐火車一邊打電話訂酒店房，驚遲啲就冇房，再打電話畀相熟燈頭約女，驚遲咗冇女揀，一出常平火車站，就見到唔少同道中人游走繁華嘅街道中。不過時至今日，大家都知昔日「性城」已經風光不再，只係現時嘅變化又係點呢？據當地一間酒店嘅老闆稱，以往燈紅酒綠嘅日子已不復再，街上行人冷清，吉舖周圍都係，早前春節期間，東莞更成為空城，蕭條程度可想而知。據呢位老闆稱，當時唔少人以為嚴打不過係一時事情，過咗去就冇咁緊，但係過咗幾年情況依舊。為咗生存，昔日嘅酒店唔係變成老人院，就係企業孵化器，即係創業中心。之但係，由於過往太過依靠色情業關係，故此今時今日仍有唔少人，期望昔日繁華景象重臨。
台灣嘅色情業者雖然同警方企喺對立面，卻甚少聽過夜場人士會同突擊檢查嘅警察起衝突，不過早前竟發生一單扯皮條圍毆放蛇警察嘅事件。話說喺3月初，新竹警方喺轄區進行掃黃行動，並派出兩位年輕警員假扮嫖客，當兩人路經湖口榮光路一間私娼寮時，由謝姓扯皮條招呼兩位放蛇警員入內揀女，並帶嚟外籍應召女郎畀兩人睇辦。兩位警員見店內既有小姐又有嫖客，於是表明身份，然後將謝男帶入房間問話。點知謝男即刻呼救，店外其他扯皮條隨即湧入房內，以木棍同摺櫈圍毆兩位警員，兩位警員奪門而出，向附近埋伏警員呼救，一眾扯皮條即時鳥獸散，結果警方將謝男、3名應召女郎及兩名嫖客帶回警署。謝男經偵訊後被控以妨害風化及妨害公務罪送辦，而警方除全力追查其餘毆警扯皮條外，更成立專案小組，務必徹底掃蕩榮光路一帶嘅私娼寮。
日本近年嘅經濟唔係咁好，而為咗刺激國民消費，早前發起並推動「Premium Friday」活動，呼籲逢每個月嘅最後一個星期五，打工仔可以提早放工，例如原本係下午5點收工嘅話，可提早至下午3點，既可降低打工仔工作壓力，又可以刺激消費。呢個活動一推出，唔單止唔少餐飲業響應，亦有唔少風俗店推出「Premium Friday」嘅優惠計劃，好似位於橫濱嘅美體美容風俗店「Shampoo娘」，玩家如果下午3點後入店，可獲得指名料半價優惠，另外亦有風俗店推出服務費折扣嘅活動。不過綜觀整個日本風俗界，其實並唔係咁積極參與呢個活動，而佢哋嘅理由在於玩家習慣晚上7至9點呢段時間去風俗店，縱然佢哋可以提早放工，卻好難會改變習慣。此外，佢哋亦覺得提早兩個鐘左右放工，打工仔情願去酒吧飲番杯啤酒，對風俗業嚟講唔會直接受惠，難免令眾多風俗店抱觀望態度。
撰文：魂