喺普天同慶嘅聖誕佳節，大家都已經諗好點樣慶祝狂歡一番，而慶祝少不了派對，喺派對當中梗有好多女仔在場，點樣能夠增加「得米」機會呢？
好緊張呀！好兄弟為咗我嘅下半生及下半身着想，約咗好多女仔出嚟開聖誕燒烤大會，當中好多都係單身，朋友話小弟到時猶如虎入羊群，食到停唔到口！小弟的確相當高興，但係又相當緊張，因為今次機會難逢，錯過咗就唔知要等幾耐至有下一次喇！如果大家同小弟一樣好心急想喺聖誕聚會或派對當中成功「得米」，就要留意以下由英國新聞網站Daily Star嘅知名溝女專家James Moore提供嘅聖誕「搵食」貼士喇！首先專家話男士們喺打扮方面，心口冇乜衣服遮住，樽領衫更加唔好着，因為咁樣女仔就會覺得你夠強壯以及有男人味。同女仔相處眼神接觸亦好重要，再加個微笑，就可以令對方知道你對佢有濃厚興趣，如果雙眼左右望就注定食白果喇。談話嘅時候當然要爭取機會同對方有身體接觸，但喺搵到機會之前男士雙手可以多喺自己胸口前郁動，咁就可以令對方集中注意力喺你身上。如果對方注意力分散又點算呢？專家話男士可以先退後一步再踏番前，咁就可以重新令女仔集中注意力於你身上喇！
承接上面講嘅題目，James Moore仲有其他「搵食」貼士同大家分享，當中包括氣味方面。男人一身汗味當然令女仔避之則吉，為咗遮掩濃郁嘅體味以及增加魅力，好多男士都會噴古龍水，不過James Moore就話古龍水最多都係噴少少好喇，因為太濃味會遮蓋男士本身散發出嚟嘅訊息素，吸引力不增反減。喺派對同聚會少不了美食，男士們記住要同女仔分享，仲要招呼周到，例如幫對方切開太大件嘅食物，專家話如果你嘗試拎起食物餵到對方嘴仔，而對方又肯食的話，咁就千祈唔好猶豫，即係拖實對方起程搵個地方「相聚一刻」喇！除咗行為方面，James Moore仲推介幾句適用於聖誕節嘅冧女對白畀大家參考，例如「請你企上聖誕樹頂，因為天使應該企喺嗰度。」「可唔可以同我合照，等我將呢張相拎畀聖誕老人睇，話佢知我今年要邊份禮物。」「有人話我似聖誕老人，因為我可以『忙碌』一整個晚上。」
撰文：賢