人生固然唔係一味做做做，事關呢種叫做驢仔嘅人生；人生亦唔係一味玩玩玩，皆因呢種只會係空虛嘅人生。最完美嘅人生，應該係工作同玩樂兩者之間取得平衡，而南韓氣質車模嚴祉雅就能夠做得到喇！
如果形容一位女性為氣質女神嘅話，總係似暗示佢冇身材，但事實上並非如此，好似氣質迷人嘅嚴祉雅，同時擁有前凸後趷嘅身材，加埋夠高挑，呢副胴體令人一見難忘。喺2012年以車模身份亮相於釜山國際車展嘅祉雅，當時佢為汽車品牌站台，而呢次亦係佢嘅處女演出。憑住迷人身段及優雅氣質，令佢成為全場焦點，同時佢嘅照片亦火速喺網上瘋傳，人氣一時無兩。自從呢次演出之後，佢備受重視，翌年更成為南韓CJ超級賽車嘅專屬模特兒，須知道能夠成為呢個人氣極高比賽嘅專屬車模絕對係榮譽，足見祉雅實力強勁，同時其曝光率及知名度亦大大提高。及後佢被唔少車隊睇中，先後成為多支車隊嘅專屬模特兒。除咗活躍於賽車場上，佢亦不忘其他工作，喺2015年佢便以展場女郎身份喺國際遊艇展中演出。
之後，喺各種電競比賽及遊戲展中都會見到祉雅嘅身影，而化身做遊戲展女郎嘅佢，表現得更加熱情同活潑，皆因佢係一個不折不扣嘅電玩迷，最鍾意嘅活動就係打機。不過大家咪以為佢只會宅喺屋企，佢最愛約埋成班朋友一齊打機，玩得開心又熱鬧之餘，又可以展現一下打機實力。究竟祉雅打機有幾叻呢？原來佢擅長玩射擊Game，不但反應夠快，仲能夠掌握到對手嘅戰術。此外，唔理係乜嘢類型嘅遊戲，佢只要花上十幾分鐘，就可以摸清遊戲中嘅訣竅。打機打得咁叻，點解祉雅唔朝向電競範疇發展呢？佢表示以前真係有咁諗過，但係覺得如果以打機作為個人事業嘅話，可能會承受唔到當中嘅壓力，仲有可能因為日打夜打，最終令佢討厭打機。而佢覺得模特兒嘅工作令佢見識到更大嘅世界，並且從大家嘅讚賞，令佢獲得滿足感。
簡介：嚴祉雅認為人生應該係工作時工作，遊戲時遊戲，彼此更係缺一不可。為咗平衡工作壓力，佢認為打機係最好嘅減壓方法。大家想睇阿妹打機時有幾投入，就要登入佢嘅IG啦，仲有好多自拍靚相睇。
網址：https://www.instagram.com/umji0714/
出生地：首爾
身高：170cm
三圍：35、24、34
撰文：魂