有人辭官歸故里，有人漏夜趕科場，日本AV界每年都有好多新人出道，亦有唔少女優引退。好多人都會問女優引退之後會做乜呢？大部分都會以普通人身份重新生活，亦有部分轉型為藝人，至於近年轉型得最成功嘅一定係美乳小天后成瀨心美喇！
慘慘慘！最近藝能界傳來一單女藝人消息，但係就有唔少資深AV迷認為性質屬於悲報多於喜訊，就係傳奇AV女王及川奈央宣告同一位41歲辦公室男職員結婚喇！現年35歲嘅及川奈央真係迷盡萬千AV迷，風騷誘人嘅演出，加上苗條又好波嘅極品胴體，絕對可以同經典女優加納穗瑞並駕齊驅。而為奈央嘅人生履歷表添上傳奇性嘅，仲有佢喺三仔界人氣當旺之際，卻無端端轉去拍無格仔嘅四仔，令粉絲們又驚又喜！奈央引退之後憑個人努力洗底做女藝人，拍過好多電視劇以及電影，為少數成功轉型嘅AV女優！而要數另一個成功轉型嘅例子，就一定係成瀨心美喇！好波而小巧嘅心美出道於2009年，極其可愛妹系魅力比起現時AV界嘅妹系小天后初川南不遑多讓，不過正因為盛名之累，心美受各大小AV廠邀請拍攝AV，搞到身體難以負荷巨大嘅床上工作量，因此喺2013年2月宣告因身體不適而唔再拍AV。
剛過去嘅12月1日乃係世界愛滋病日，而成瀨心美就特別選喺呢一日上街，不過就唔係以遊行方式嚟宣揚預防愛滋病嘅訊息，而係以更直接嘅方法，就係向公眾派發避孕袋喇！心美當晚去到特別「性地」，即係位於秋葉原嘅情趣用品店M's Online大樓門外派套套，由於時近聖誕佳節，心美換上聖誕女郎服上陣，而佢初時以為派避孕袋一定被人火速搶晒，點都估唔到，到場領取避孕袋嘅朋友個個都好有耐性咁排隊。要派發300個避孕袋其實好快，不過心美卻花咗30分鐘，因為心美要提醒每個嚟領取避孕袋嘅朋友要好好保護自己同伴侶，事前要檢查一下個袋有冇破損，夠晒細心。派完之後，民眾唔願離開，梗係啦！見到咁可愛嘅心美，梗係一擁而上同心美合照，再將照片放上網呃Like啦！
其實大家想見多成瀨心美幾面都唔難，因為心美嘅曝光率相當高，一來佢係網絡電視節目《魚拓と成瀬のツキとスッポンぽん》主持之一，二來心美仲自組樂隊「mezcolanza」，大家喺視頻網站就可以搵到心美同樂隊嘅精彩獻唱！另一方面，心美雖然唔再拍AV，但係依然同AV界脫不了關係，因為AV廠宇宙企劃同心美保持良好關係，除咗搵佢做宣傳部部長，一有公開活動就會搵佢做司儀。成瀨心美成功轉型做藝人之後，AV迷依然難忘阿妹，難怪精選AV作品集《SUPER IDOL 成瀨心美完全收錄 BEST-2》一推出就登上AV銷售網「SMM.com」嘅銷量榜冠軍位置，連帶心美嘅人氣度亦上升為冠軍，波多野結衣都係排第二咋！
提到心美呢個名，順帶一提，引退兩年幾嘅火辣尤物櫻心美最近亦有消息，佢喺社交網上表示自己轉咗行做時裝店店員，話未有男朋友，大家如果去到日本買衫嘅時候見到櫻心美就不妨多多「溝通」喇！
撰文：賢