每個人總有自己嘅夢想，只係喺邁向夢想嘅過程中，有啲人需要暫時將佢放低，等到適合嘅時機，先至再朝住夢想邁進，而南韓模特兒閔松怡就係其中一個。佢嘅夢想係成為一位藝術教育工作者，為咗將來可以安心朝住呢個目標進發，現時惟有專注於模特兒嘅工作，好為未來嘅發展作出準備。
出生於南韓仁川嘅閔松怡，不但擁有鄰家女孩嘅純情氣質，而令唔少男士着迷嘅火辣身材，唔單止在於佢前凸後趷嘅三圍，更在於一對修長美腿，令人心動不已。除咗有外表，阿妹嘅內涵亦相當吸引，喺京畿藝術高等學校修讀藝術嘅佢，對於藝術有深厚嘅造詣，其後佢喺首爾誠信女子大學修讀藝術學位，擅長畫漫畫，更精於油畫創作。
既然佢對藝術有如此熱愛，點解佢家陣又會成為一位模特兒呢？原來喺佢讀緊大學時已經兼職咗3年平面模特兒工作，及至2014年大學畢業後，佢見到有個格鬥舉牌女郎比賽，而當中嘅獎金相當吸引因此決定參加。佢打算喺贏得獎金後，實現藝術教育嘅夢想。結果佢得到亞軍，獲得喺格鬥擂台上亮相嘅機會，亦頻頻喺宣傳活動中曝光，及後被模特兒公司睇中而成為專業車模，只要有車展，都會喺展台上見到佢性感嘅身影，而佢參與過嘅車展，分別有釜山改裝車展、首爾車展等。另外，佢以賽車女郎身份，喺亞洲勒芒系列賽、超級跑車賽等賽事中亮相。連串嘅演出令佢不但喺車模界人氣急升，喺網絡上亦湧現大量佢嘅迷人倩影，及後佢更踩入寫真界，透過唔同嘅造型展現美態。
密集式工作，對好多新進模特兒嚟講會感到辛苦同壓力，不過松怡卻冇呢個問題，究竟乜嘢會令佢如此堅持，而當中係咪同佢嘅夢想有關呢？據佢解釋之所以如此努力，首先佢明白模特兒生涯較短，若然唔把握時間努力衝刺嘅話，未來好難再獲得好成績。其次係佢希望開設一間藝術教育學校，目的係將有藝術潛質及有志喺藝術界發展嘅學生，提供一個成長嘅空間。
松怡又話之所以有呢個夢想，係同當年喺大學時，曾經做過藝術科補習老師有關。原來當時嘅佢目標只係希望成為藝術家，只係呢次工作機會後，卻發現原來教導學生別有一番滿足感，尤其係見到學生不斷進步，嗰種滿足感比畫出一幅滿意作品更加大。從此，佢將目標改變為開設藝術學校。問到佢若然夢想成真嘅話，會唔會做埋講師呢？佢笑稱一定會咁做，並聲稱唔擔心啲學生會分心，因為作為專業講師嘅佢，識得點樣令學生將精神集中喺創作上。事實上，佢一直以嚟都冇放棄過藝術創作，經常喺個人社交平台分享各種漫畫風格嘅自畫像，畫功相當唔錯o架！
簡介：閔松怡擁有令人着迷嘅外形，尤其係一對激凸咪咪更係相當吸睛。不過講到佢最令人印象深刻嘅地方，就係對藝術嘅追求，雖然佢今日只能透過自畫像嚟展現藝術造詣，相信以佢堅毅嘅性格，終有一日可以達到佢嘅夢想。有興趣可以Click入佢嘅IG欣賞其作品。
網址：https://www.instagram.com/song0876/
出生地：仁川
身高：168cm
三圍：33、24、36
撰文：魂