單係喺美國，職業脫星成千上萬，有冇諗過點解有囡囡撈得掂，有啲則砌極都上唔到位呢？關鍵在於波哋？性格？定命水？無謂諗喇，其實統統都係次要，真正令脫星優勝過人嘅係識得Marketing先啱！正所謂幕前形象要悉心包裝，私底下一樣重要，唔好理阿妹係真心定假意，今日最令四仔迷追捧嘅脫星都講求親和力，就好似以下幾位姐仔，無論佢哋剝定唔剝，喺四仔迷心目中依然係女神，因為夠貼地嘛！
日本AV着重先睇樣再睇架生，美國都係，之但係人哋接受程度高，就算囡囡唔索，「淫格」搭夠一樣有得發揮，但大家都留意到，總係有啲囡擔唔到大旗，有人賴人緣，「講呢啲」嘥氣啦，你同我都係睇脫星做戲，曾幾何時你有見過佢同你講心先？況且阿妹做戲咁叻，咁易畀你睇到真實一面咩！嗱，目前四仔界，新女唔計，單係一班浸淫5年或以上資歷嘅姐仔，好似Stoya、Dani Daniels、Jessie Andrews等，四仔固然要拍，但總唔會畀其他脫星特別，點解佢哋紅得起，最大原因係識得喺社交網「發功」，咪以為免費發放色情益街坊就紅梗噃，查實男人睇「好嘢」求其一個鹹網都有啦，巴打肯主動Follow脫星嘅社交網，完全係想睇囡囡背後一面，因此識玩，一定玩「無料社交」，即係乜料都無，着番件衫，做番平民，咁先夠真實呀！
講態度，Stoya喺脫星界敢認第二冇人敢認第一！Staya姐早就宣布唔拍主流四仔，要拍就拍自己「性幻想」四仔，而且絕大部分係女權四仔添，Stoya仲巴閉到同女神Kayden Kross成立嘅公司製作自家四仔，鍾意幾時拍、點樣拍、選用邊個對手都話晒事！但以上都只係Stoya其中一面，睇佢嘅社交網同你我他一樣，都係咁貼地，飲飲食食，拍拖「放閃」，雖然身為一線脫星，但Stoya基本上係唔會分享色情嘢，講得最多係佢兩隻貓同音樂，仲有男優男友Wolf Hudson恩愛合照，唔扮矜貴令人睇得舒服，成功走紅，咪就係咁簡單囉！
講女神，點可以冇Dani Daniels嗰份呢？呢位於今年初捧走「XBIZ Performer of The Year」嘅脫星，係咪唔講巴打唔記得呢！點解嘅？咪因為低調囉，對Dani妹嚟講，獎項絕對重要，事關佢喺任何媒體訪問都話做脫星係因為交學費，咩學費？學藝術囉！嗱，向來只「睇肉」嘅四仔迷，係咪唔知阿妹有另一個藝名叫Kira Lee先？呢個朵近期喺紐約好紅o架，因為阿妹上個月學有所成，開展覽將自己嘅畫作同人分享，其實Dani喺社交網如Twitter都經常自拍分享，睇到阿妹拿起畫筆畫畫似模似樣（口架）。除咗玩藝術，承認雙性戀但又單身嘅Dani妹經常一個人去旅行，就上個月之嘛，阿妹遊遍泰國清邁、布吉、曼谷，如果唔係要開工，佢話玩一年都未夠喎，睇佢嘅旅行自拍照，唔扮嘢，連妝都唔化做番自己，夠晒親民，咁咪人人Like囉！
Jessie Andrews嘅社交網唔只吸引細佬Follow，好多潮友或女士都畀Like佢，因為阿妹實在太Pure太True喇！查實睇咁耐都唔明，一件咁人見人冧嘅脫星，床上又玩得咁癲，何不索性包裝做癡女，坐硬四仔廠一姐，咪大把世界囉！但Jessie認為人有好多面，所以拍四仔同時，要實現佢嘅音樂夢，去夜場做DJ捽碟，睇佢喺社交網分享，成績應該唔錯。同時佢係一位潮人，就幾個月前，阿妹接受潮流網站專訪，仲素顏上陣，有勇氣！
已經宣布唔再係脫星、後悔做過脫星、更拍片呼籲婦女要遠離色情行業嘅Bree Olson，雖則負面新聞有好多，但佢永遠都係四仔迷心目中嘅女神，社交網粉絲過百萬唔在講，當年連查里辛都冧得掂就知阿妹猛料啦！無他嘅，童顏加32D堅波，為人又有腦，好似佢做脫星期間，喺Twitter、IG及Facebook唔會大談色情，反而係講脫星界不平等待遇問題，到今日離開咗脫星界，更加維護女性地位權益，呢期總統大選，阿妹嗌晒咪力撐女方，連政治都關注埋，好強呀！此外仲有溫柔一面，阿妹今期學人寫愛情散文，雖然唔知係咪佢度，但喺網上世界其性格都咁立體，咁嘅女神畀你都想要啦！
講真心講有愛，我諗Asa Akira係行內行外都會第一時間諗起嘅脫星，就4月嗰陣先幫好姊妹Dana DeArmond 喺籌旗網站發起「PROJECT MILF」眾籌隆胸活動，義氣仔女當之無愧，其實阿妹私下都好有愛心，留意佢社交網除咗講鹹嘢，分享最多係動物生活照，連網友遺失狗隻都幫忙轉發，就知佢有愛心啦！話時話，Asa Akira從來都唔係Sell索樣，佢本人都話頂多係Sexy，但點估到夠膽玩自我醜化，將經理人Mark Spiegler個樣Key喺自己臉上，好有幽默感囉！
撰文：祖