秋季運動會女優做極唔攰

星光熠熠

日本AV集團當中，以SOD表現最活躍，我所指嘅係佢哋樂於安排旗下嘅AV女優，透過不同活動與AV迷接觸，等大家唔使只靠睇AV碟同女優見面，比起AV界龍頭大集團北都集團嘅閉門政策，不知造福幾多AV迷。除咗SOD之外，另一AV集團KMP一樣對AV迷相當關懷，唔單止將旗下嘅專屬女優組成Million Girls Z，以樂壇女子組合身份四圍登台開騷，今年2月同7月仲搞咗個百萬學園運動會，除咗出動KMP一眾專屬女優，仲搵嚟好多外援女優，實行同班AV迷齊齊做運動及進行各種玩得開懷嘅競技項目。好似早前就舉行咗「百萬秋季運動會」，當日有即將離開KMP嘅兩個「香」出席，即係星美梨香及友田彩也香，兩位姊妹在陣，作為小師妹嘅KMP未來支柱佐倉絆當然有出現啦！此外，仲有阿部乃美久、乙葉七瀨、佳苗瑠華、南梨央奈、濱崎真緒以及尾上若葉，認真星光熠熠！

分組激鬥

當日班女優同一班透過公開招募而來嘅AV迷一早就到場，雖然天氣寒涼，但係亦無損佢哋玩樂嘅熱情！而眾多女優分成三組，星美梨香、佳苗瑠華以及濱崎真緒係紅組，桃組由友田彩也香、阿部乃美久以及尾上若葉組成，黃組成員則有佐倉絆、乙葉七瀨同南梨央奈。運動會開始之前，大家都先做吓熱身運動及合唱大會主題曲，然後開始第一場比賽，就係搶佔陣地喇！玩法好似爭櫈仔咁，地上放咗幾個呼拉圈，三組成員同一時間衝埋去企入個圈入面，為之佔領陣地，搶佔陣地最多嘅一組為勝。喺比賽當中，班女優同AV迷都開盡馬力鬥快搶佔陣地，乙葉七瀨仲唔小心玩到碌咗落地，小心呀！最後比賽由桃組勝出。

之後就到跳大繩比賽，雖然班女優個個都着到好密實，但係跳繩嘅時候，亦可以睇到佢哋心口不住起伏，最搶眼當然係9位女優當中最大波嘅濱崎真緒啦！不過，可能因為佢哋嗰組下圍負擔重，而黃組班女優又冇乜運動細胞，所以又係桃組勝出。

熱情玩波

第三場比賽突然轉變成猜謎比賽，黃組喺聰明伶俐嘅佐倉絆帶領之下終於贏番一鋪。第四場比賽扯大纜，桃組嘅阿部乃美久同尾上若葉雖然細細粒，但係估唔到佢哋氣力相當大，而紅組就慘喇，星美梨香等三人都弱質纖纖，梨香更加係帶病作賽，而黃組成員雖然精神奕奕，但係輸身形，最後由桃組再下一城。鬥完力，第五場就鬥快，三組成員搵一個成員飛咁快用廢紙塞滿垃圾桶，將再垃圾桶交由成員一個傳一個傳到終點為止，今次星美梨香嘅紅組終於開齋，威番一次喇！

最後一場比賽係躲避球，雖然紅組同黃組都講究戰術，但係兩組嘅女優實在太冇戰鬥力，一班AV迷隊友個個都為咗保護佢哋而「犧牲」，最後桃組又贏，結果贏得全場總冠軍！喺今次運動會當中大家都玩得好開心，可惜星美梨香12月就引退，而友田彩也香亦會離開KMP，下一次運動會可能就冇今次咁有睇頭喇。

撰文：賢