日本特攝片紅遍上世紀80至90年代，只係焦點往往落喺主角身上，而忽略咗一班美艷女角色，好似特攝經典女演員森永奈緒美就係其中之一。其後佢拍攝全裸寫真大膽解放，終於讓唔少人欣賞到佢誘人一面。
喺1964年3月12日於日本神奈川縣出生嘅森永奈緒美，擁有高挑身材，甜美嘅樣貌。1981年時，佢從神奈川縣立大磯高等學校畢業後，就參加藝能事務所Japan Action Club嘅第11期藝人訓練班，接受演藝訓練，更練出敏捷嘅身手。由於佢嘅外形出眾，加上動作女演員唔多，故此好快就獲得演出機會，就係客串演出特攝片《太陽戰隊 太陽火神》第29集，之後佢又客串演出電影《狂吼鐵拳》，自此之後，佢頻頻喺特攝片同電影中登場。不過講到佢真正備受注目，卻要數1983年演出特攝片《宇宙刑事Shaider》，片中佢一貫可愛迷人，加上身穿迷你裙，經常有露出白底嘅鏡頭。雖然佢對呢套露底戲服相當不滿，由於係佢第一次擔正做女主角，加上憑住露底而獲得人氣，故此佢決定繼續演出，亦從此同呢套作品有着密不可分嘅關係。
因為呢套特攝片令佢嘅可愛形象深入民心，所以跟住嗰幾年，佢嘅戲路受到限制，加上新鮮感不再，因此喺1987年佢推出寫真集《NAOMI》，呢本唔單止係佢嘅處女寫真集，更全裸示人，喺唔少人心目中，佢嘅形象係清純可人，呢次大膽一脫即時成為大家嘅熱話，縱然有唔少批評聲音，卻有眾多人激讚佢身材迷人，散發出青春魅力。喺1990年8月佢推出第二本全裸寫真《NAOMI：2》，同樣熱賣。1994年6月推出主打青春嘅密實寫真《Double Face》，而1996年1月佢再次喺寫真集《Bitter & Sweet》中裸體示人，而銷量更勝從前。及至1998年時，佢宣告退出藝能界，喺2001年7月推出寫真集《N.M.D.C》後就冇再拍戲，只客串演出電影，可能有人覺得呢種一脫求名嘅方法唔可取，只係大家唔可以忽略，作為一位動作演員，佢曾經受過唔少大大小小嘅傷，好似佢演出《宇宙刑事Shaider》時，喺拍攝中被車撞傷，但佢仍然繼續演出，呢份對演出嘅執着精神，絕對唔可以忽略。
撰文：魂