最近有調查結果顯示世界各國嘅平均破處年齡，發現年齡最細嘅係冰島。錫錫可以話係男女感情關係嘅一道關卡，到底男方要講咩說話先可以去到呢一步呢？
師傅教我，去邊度夜蒲都好，最重要就係唔好飲得太醉，亦唔好沉迷，需要懂得如何抽身，上床要注重安全，更重要嘅係一定要確認對手夠秤！否則「衰十一」真係喊都無謂喇！提到呢方面，近年喺香港就少有未成年少女初嘗禁果嘅新聞報道，到底係佢哋保密措施做得好，定係識得保護自己呢？咁就真係唔知喇！最近，一個安全套品牌經過一輪調查之後，列出世界44個國家及城市嘅平均破處年齡，結果我哋香港人平均破處年齡係20.2歲，喺眾多接受調查嘅國家及城市當中排第六名。至於第一位係馬來西亞，平均年齡為23歲，而我哋偉大嘅祖國係22.1歲，排第四名。咁邊個國家破處年齡最細呢？答案就係冰島喇！平均年齡為15.6歲，嘩！乜佢哋咁早熟呀！
「我和你吻別，在無人的街……」歌神呢首《吻別》好聽又有意思，堪稱情歌當中嘅經典，每次聽到都令我有少少傷感，因為小弟溝女次數極多，但係溝到手嘅次數則極少，通常都只係發展到拖手仔嘅階段之後就無疾而終。曾經有幾次想同對方作進一步發展，我嘅意思係想錫錫對方個嘴仔，但係都未能成功！相信好多朋友都好似小弟咁，喺拍拖嘅時候好想同對方錫錫，但係唔知點樣開口呢？日本官能小說家小川沙耶最近撰文列出三句增加與對方錫錫成功率嘅說話。小川沙耶話，大家可以先同對方講「你雙眼真係好靚呀！」讚美說話係人都受落，而呢個時候仲可以同對方四目交投，增加感情交流，再慢慢將嘴仔送上，對方自然容易接受。沙耶表示仲有一句說話適合喺一班人唱K時使用，就係「過嚟呢一邊，瞌埋雙眼。」沙耶話K房熱鬧嘅氣氛會令女方放低戒心，而你將佢帶埋一邊又營造出一個浪漫嘅私人環境，女方亦會較容易獻吻。沙耶亦表示可以同女方一齊睇愛情電影，見到男女主角錫錫，就可以趁機會同佢講「我想學佢哋咁做。」愛情電影一向都影響女仔最深，大家有樣學樣亦好順理成章吖！
撰文：賢