男士要令女仔對自己產生興趣，除咗要有個人吸引力之外，仲要促進女仔嘅血液循環。發夢人人都會，而發不同嘅夢亦有不同解釋，發綺夢當然亦有原因啦！夜深人靜，好多人都會做自己愛做嘅事，但係有調查顯示呢個亦係溝女最佳時機。
好多朋友都知道小弟近期溝緊一個斯文女仔，小弟就覺得呢類女仔最難處理，點解？平時我要撻着一個女仔會講吓鹹濕笑話，再講吓與性有關嘅話題，但係對住談吐斯文、舉止優雅嘅女仔，我真係鹹濕唔嚟！咁點算呢？英國網站SuperfoodUK.com嘅營養師Shona Wilkinson最近撰文教大家幾招撻着女仔。佢話女仔嘅性趣來源同男人差不多，好多時都係由性器官充血而引起，故第一招就係促進血液循環，需要點做法？同佢做至少20分鐘運動啦！拍拖出街點做運動呀？可以帶對方去到有娛樂設備嘅酒吧，家陣有酒吧可以玩啤酒乒乓球，咁咪可以做到運動囉！第二招係食羅勒葉，可以促進體內血液循環，其味道更加可以令人增添野性，我少食西餐喎！邊度有羅勒葉食呀？羅勒葉又有九層塔、金不換之稱，食泰國菜咪食到囉！第三招就係溝通，營養師心理亦好重要，真係「很想要」的話，不妨照直講喎！我開得到口就唔使搞咁多嘢啦！
「寂寞難耐，噢！寂寞難耐…… 」近期小弟都唱住呢幾句歌詞，點解？因為溝唔到女，成日都冇囡囡陪我，唔覺得寂寞就奇啦！係咪先？好多人都話「為何深夜總是餓」，我就話。「為何深夜總是寂寞空虛」。根據外國一個專門組織街頭派對嘅網站「The Big Lunch」嘅調查顯示，受訪嘅眾多18至35歲男女當中，有83%每逢深夜時分就會倍感寂寞，而佢哋覺得以下三個喺深夜時分發生嘅情況最感到相當難受：第一個係伴侶唔喺自己身邊，呢個情況當然唔難理解。第二個係上社交網站瀏覽其他人發布新消息嘅時候喇！因為此時成日都見到人哋活得咁精彩，身邊又有個親密朋友陪伴，而自己就一個人喺屋企，令人悲從中來。第三就係夜深時分睇戲，幾乎每部戲都會加入感情線、親情線，睇到人哋愛得要生要死又有人錫，寂寞感覺又再湧現。講咗咁耐，男士們應該知道點做啦！想溝女的話就要揀個夜深時分，打個電話或傳個訊息畀對方，好大機會撞正對方正值芳心寂寞之時，感情自然一日千里，甚至即晚被徵召去「慰藉芳心」啦！
記得以前小弟好後生嘅時候，瞓覺經常都會發夢，到青春期嘅時候更加成日發起綺夢來，每次醒來都仲回味箇中情節，但係轉個頭又後悔，因為整到條褲濕晒！不過話時話，每次發綺夢，小弟嘅對手都唔係自己嘅心儀對象，點解會咁呢？最近心理學家Tamara Trusseau就為大家解夢，分析一下大家嘅夢境有何意思。Tamara Trusseau經過多年研究之後，就話大家發綺夢同其他人做愛，其實唔代表思想特別好色，只不過食色性也，同大家夢見食物差不多。至於綺夢嘅對象，有9成受訪者都表示唔係自己嘅「床上目標」，只係該人同你係相識而已。至於夢見自己往下墮，可能係真實生活當中面對有失控情況，Tamara Trusseau話要特別注意自己安全。而夢見自己甩牙，就代表身體狀況甚差，更需要密切注意性功能，原因可能係飲食上吸收唔到足夠營養。
撰文：賢