提到日本樂壇最性感嘅女團，相信一定係由日本AV女優作為骨幹成員嘅惠比壽★麝香葡萄，佢哋稱為「性感最強」。而擁有「地下最強」稱號嘅仮面女子，雖然唔及麝香葡萄有30多個性感美女成員，但係佢哋嘅成員經過精挑細選，個個歌藝出眾，身材索爆，到底邊一隊至係最強呢？12月16日自有分曉，當晚兩支「最強」女團將會來個舞台大決戰！
兩隊女團當晚將會聯手開演唱會，名為「恵比寿★マスカッツ喧嘩上等ライブ VS仮面女子 8100円をうのどっちだ!?このバカタレが! in Zeppダイバーシティ東京」，同時上演連場歌舞對決！據悉，兩隊女團早於8月開始「結怨」，事緣麝香葡萄喺排舞室綵排，突然仮面女子成隊人出現，兩團就排舞室使用權及費用而發生爭執，於是在場嘅知名女主持大久保佳代子等人就提出兩隊女團嚟個舞台對決，輸咗嘅一隊就要畀排舞室部分費用，約8,100日圓！咩話！就係為咗600幾蚊港紙而決鬥？銀紙事小，面子事大嘛！至於呢8,100日圓費用係點嚟呢？由於當日麝香葡萄原本係打算借用排舞室綵排4小時，而喺頭一個鐘仮面女子就出現搞搞震，擾攘咗成個鐘先肯走，4小時費用為36,400日圓，於是叫仮面女子為其中四分之一收費，即係8,100日圓埋單喇！
喺兩隊女團踏上舞台對決之前，仮面女子心生不忿，未等到12月16日進行對決，先嚟個突襲！於9月28日晚播出嘅一集麝香葡萄專屬電視節目《麝香葡萄之夜》當中，仮面女子喺節目錄影途中突然踩場，麝香葡萄見到仮面女子嚟到自己地頭寸寸貢，呢道氣又點吞得落呀！兩隊女團先眼神互睥，然後仲有「動作場面」出現，差少少更演變成為集體「武鬥」添！幸好，大家最後都能夠保持克制，否則唔小心整傷塊粉面就心痛死一班粉絲喇！事後麝香葡萄一眾成員都表示今次一定要加倍努力練習，喺12月16日嘅演唱會堂堂正正將仮面女子擊敗，真係令人好期待呀！
喺節目當中，仮面女子踩場除咗幾乎引起一場武鬥，佢哋仲大罵麝香葡萄嘅成員係小氣鬼，區區8,100日圓仲要追討！點解？因為麝香葡萄唔少成員都係富婆囉！罵人須有理，仮面女子咁講法又唔係冇根冇據，佢哋仲從秘密渠道取得唔少麝香葡萄嘅銀行存款資料，更加喺節目中大爆料！首先佢哋爆出隊長明日花綺羅身家有1億日圓，即係約有700多萬蚊港紙！至於湊莉久貴為上屆DMM成人大獎最優秀女優得主亦唔弱，身家有5,000萬日圓！而頻頻出騷嘅川上奈奈美就有4,000萬日圓，佢哋三個可以話係圈中富婆。爆完料之後，仮面女子不禁得戚，而麝香葡萄唔知係怕對方繼續爆料，定係想息事寧人，居然冇繼續鬥落去，反而邀請仮面女子一齊玩音樂爭櫈仔，真係估佢哋唔到！
撰文：賢