經常聽人話模特兒界亦係一個名利圈，如果要成功嘅話要靠名氣，而為咗爭名逐利卻往往會令人變得世俗。不過凡事並無絕對，好似嚟自南韓人氣車模申海莉，雖然佢喺模特兒界擁有極高人氣，但係佢沒有絲毫嘅塵俗味道之餘，更畀到人一種超凡脫俗嘅感覺。
今年24歲嘅申海莉，出生於南韓蔚山廣域市，雖然蔚山係個工業城市，但佢同工業卻一啲關係都冇，反而因為非凡嘅氣質，同埋一對修長美腿而為人所熟悉。作為一位專業模特兒，其實佢最初並冇諗過喺呢個方面發展，反而有心向娛樂圈進發。不過有啲嘢係整定嘅，話說喺2012年時，佢參加選美比賽，憑住清麗嘅外形而成功奪冠，本以為可以向娛樂圈發展，卻被模特兒公司睇中，搵佢做模特兒。當時佢抱住不妨一試嘅心態演出，結果表現淡定，加上仙氣不凡嘅氣質，不僅為佢贏得眾多關注，更被電子品牌睇中，搵佢擔任商品模特兒。前後喺多個電子產品展銷會站台嘅佢，成為展場中嘅焦點，亦令佢喺模特兒界獲得更多人氣。
不過講到真正令佢備受大家注視嘅，卻要從賽車場上講起。正當佢積極投入模特兒工作時，獲得汽車品牌邀請，擔任車隊嘅賽車女郎，一直以嚟着得相對密實嘅佢，換上性感嘅賽車女郎制服，即時展現出玲瓏浮凸嘅身材，而佢嘅照片隨之喺網絡上廣為流傳。
不經不覺喺賽車及電單車比賽場上，擔任賽車女郎至今已有3年幾，每當佢出場時，例必成為鏡頭拍攝對象。不過由始至終，佢都不忘模特兒身份，經常喺各類型時裝、化妝及美容雜誌上亮相。如果大家有留意嘅話，唔難發現佢極少以性感造型示人，最多只係露出少許事業線。據佢解釋，由於性格保守，對於性感衣着較為抗拒，另一方面佢認為自己最靚係一對修長美腿，故此鍾情熱褲及迷你裙。
唔少人對佢私生活都感到興趣，唔知平時會做乜呢？答案係宅喺屋企！大家唔好以為佢吹水，事實上當佢冇工開時，最愛留喺屋企陪伴家人。孝順固然係女神必備嘅條件，只係佢宅喺屋企另一個原因，係為咗兩隻白色比熊犬。原來愛心爆棚嘅佢視兩隻狗仔為屋企人之餘，更當佢哋係親生仔，不論任何天氣或心情，都會花時間同佢哋行街同談心。唔知係咪因為佢花太多時間喺屋企人身上，令佢至今仍然單身呢？
簡介：申海莉喺模特兒界擁有超高人氣，但佢並非賣弄性感，亦非出位言行，單憑優雅氣質取得支持。至於佢嘅私生活相當平淡，從佢嘅IG就可以見阿妹經常與狗同樂。
網址：https://www.instagram.com/shin_haeri_/
出生地：南韓蔚山廣域市
身高：170cm
三圍：33、23、34
撰文：魂