養眼同好會

最愛紮孖辮

孖辮妹有乜嘢咁吸引，吸引到有班日本人要搞個孖辮同好會之餘，更組織成一個推廣孖辮文化嘅「日本孖辮協會」（日本ツインテール協会）？呢個喺2011年12月成立，並以東京為總部嘅孖辮協會，由認為紮孖辮女仔萌爆嘅日本人古谷完聯同一班同好組織而成。

佢指出成立協會嘅宗旨在於「展示孖辮嘅魅力，讓孖辮獲得新生」。古谷完指紮孖辮嘅小女孩有好多，只係大個咗卻甚少紮出呢種髮型，擔心有朝一日呢種萌爆髮型會消失，因此協會嘅目的在於破除大家對孖辮係小女孩嘅專利，從而令孖辮獲得新生，佢哋更將每年2月2日定為「孖辮日」。此外，佢哋更先後推出孖辮寫真、年曆同舉辦孖辮美少女攝影會，吸引更多人鍾意孖辮。協會成立至今，不知不覺會員已超過4萬人，認真誇張！

食住個人氣咁高，佢哋喺2014年推出自家偶像組合「drop」，團員個個都係美少女，只係佢哋卻唔係成日紮孖辮。咁咪同組織原意有出入？冇所謂，美少女三個字已經夠晒萌嘛！

會址：http://twintail-japan.com/about/decl.html

心邪斜孭袋

斜孭袋你有我有人人都有，只係喺呢班日本人眼中，卻發掘到斜孭袋嘅魅力。呢個喺2014年8月成立，名為「π /」（又稱Pi Slash）嘅同好會，就雲集咗一班對孭住斜孭袋女性有別樣幻想嘅同道中人。同好會名字中嘅「π」，喺日本嘅次文化中指女性胸部，而「/」即係斜孭袋條斜孭帶。

據稱佢哋之所以成立呢個同好會嘅原因，係源自於2012年掀起嘅色氣斜孭袋旋風「ぱいすら」（Paisura）。當時日本網絡中有人發現，喺夏天當女性孭斜孭袋時，因為斜孭帶會啱啱勒喺雙峰之間，令胸部更加有凸出感，所以便引起網絡激烈回響。唔少網民紛紛上載各種街頭斜孭袋女性相之餘，更出現一本以斜孭袋女性為主題嘅寫真《ぱいすら女子》，同年又有另一本同類寫真《π /》推出。一時間有唔少日本男士都成為「π /」控，而呢個同好會就喺咁嘅背景下成立。

雖然佢哋嘅會旨係「破壞力拔群的π /！日本強力爆發！」但講到實質活動，唔好意思，佢哋好似偏好喺網上分享斜孭帶喎。

會址：https://twitter.com/paipaislash

清純水手服

自從睇過「代替月亮來懲罰你」後，就明白日本人對於水手服有幾咁迷戀，好似出晒名鍾意着水手服嘅日本大叔小林秀章就係其中一位。既然日本咁多人鍾意水手服，有相關嘅同好會一啲都唔奇。不過呢個喺2014年9月18日成立嘅「日本水手服協會」（日本セーラー服協会），卻係非一般同好會！

協會搞手晴乃小雨雖然係個作家，但同時亦係一位水手服迷。早喺多年前佢就已經打算成立水手服同好會，及至前年終於成事，並以推廣水手服文化為己任。搵嚟一班美少女Model舉辦水手服攝影會，推出水手服寫真都未夠，仲要喺去年8月舉辦埋水手服文化祭，另外仲夾埋一班同好，推出水手服漫畫，真係全部都係水手服！及至現時，佢哋仍然會不定期舉辦推廣活動，等大家盡情感受水手服嘅魅力。

會址：http://www.sailorkyo.com/testsite/

撰文：魂