OL生態圖鑑慾望漫延

作品大受歡迎

1961年喺日本愛媛縣松山市出生嘅THE SEIJI，原名吉村誠司，其孖生弟弟吉村萬壹為日本著名小說家。當年佢喺京都市立藝術大學畢業後，曾經留喺大學教咗一陣書，之後輾轉喺一間高校任職美術教師。26歲嘅時候以青空綠之名創作首個成人漫畫作品《Half Rita》，並投稿到出版社松文館，隨後推出《法子的春天》同《美人魚女孩》兩本作品，由於佢嘅身份問題曾引起軒然大波。其後轉到一間由書店開設嘅漫畫教室，繼續美術老師工作，並且結識到影響佢至深嘅著名成漫家兼師傅Kirara萌。

此時開始，佢唔再喺松文館發表成漫，改以月刊《COMIC GAIA》為發表基地。其後佢得到師傅同意，喺漫畫家葉月京嘅支持下於1997年開設個人漫畫公司，開始繪畫商業漫畫、插圖、遊戲角色等工作。及至2000年再度以THE SEIJI之名重投成漫界，並喺2001年5月推出闊別多年嘅單行本《不敢讓人知道體內的H》。作品大受歡迎驅使他積極創作，其後出版嘅《極上蒸糕》、《裸體SORRY》、《青空下白桃》等均屬大熱作品。

如果要形容THE SEIJI嘅漫畫風格，以「平實」最為恰當。事關佢筆下嘅女角外形並不華麗，情慾場面更非故事嘅主菜，反而十分着重人物角色嘅刻劃，同埋故事嘅鋪陳。既有搞笑系列又有深沉題材，對於鍾意劇情類嘅漫畫迷嚟講，相信會令佢哋睇得投入。

11個情慾OL故事

作為THE SEIJI成漫界中期推出嘅單行本，《OL生態圖鑑》所收錄嘅11個情慾故事女主角，都係任職唔同嘅OL行業，當中包括《山村小姐的桌子》、《紫的天職》、《新鮮的智識速遞》、《浪速伊手前大廈特別租約》、《和世的王子》、《夏美的午餐》、《砂川小姐的夏天》、《這間公司很可怕！》、《照子加油》、《睡意快消失》及附錄漫畫《巨乳OL麻里亞的受難》。為咗可以令成漫迷睇得更投入，佢特意喺漫畫目錄中，將故事女主角所屬嘅公司同職位列明，例如《夏美的午餐》發生喺「巽不動產株式會社」（虛構公司）任職接待員嘅大澤夏美身上。講到最令人印象難忘嘅兩個單元故事，絕對唔可以錯過《山村小姐的桌子》同《砂川小姐的夏天》。

《山村小姐的桌子》講述「玉造軸承株式會社」男社員澤田，一直暗戀公司接待員山村和子。喺公司工作多年嘅山村，由於條件太過出眾嘅關係，多年嚟都冇人夠膽追求，故此今年30歲嘅佢依然單身。澤田收到風，指公司要逼走山村，於是呢日提早半小時到達公司，諗住跟一直有提早半小時返公司習慣嘅山村表白，估唔到發現山村嘅秘密！原來山村之所以提早返工，係因為佢有喺接待桌自娛嘅癖好。澤田極力安慰山村，好不容易解開對方心結，更從此成為山村解決生理需要嘅拍檔。咁說好嘅表白又點算呢？

《砂川小姐的夏天》嘅女文員砂川琴子，喺一間既冇電腦又冇冷氣嘅公司「Lahaina商事」工作，而佢嘅同事只係得男營業員前田。喺夏天最悶熱嘅下午，佢留意到公司對面一個身材健碩嘅猛男建築工，結實嘅肌肉喚醒砂川苦悶嘅肉體，竟不自覺喺窗前自娛起嚟，猛男見狀竟掏出兵器對住砂川隔空對招，估唔到砂川嘅動作早被前田偷偷睇到。微妙嘅關係維持咗三日，砂川決定同已完工嘅建築工表白，估唔到對方原來早有家室。呢個時候前田出現喺失落嘅砂川面前，以真誠嘅肉體同對方表白。

撰文：魂