美國及加拿大一個最佳房事時間調查發現，唔少人希望交歡長達半小時，但專家就話佢哋想法離晒譜。辦公室戀事多，咁佢哋有需要嘅時候會喺辦公室邊一個地方親熱呢？敵人嘅敵人就係朋友，咁女友嘅女性朋友又點呢？最好梗係做埋自己女朋友啦！
每個人或多或少都會受到電影、漫畫、電視劇影響，好似小弟鍾意睇《蠟筆小新》，就學埋好多小新做過嘅搗蛋行為，但係就學唔到佢見到女仔口花花，勇敢去示愛囉。除此之外，睇日本AV時見到班男優個個都可以同女優勁砌幾十分鐘，但現實中根本好難做得到。而早前性學專家Eric Corty訪問咗好多成年男女，當中大部分人都覺得激戰時間最好有半小時，但係專家就話佢哋咁諗法屬於離譜，因為要做半小時除咗需要驚人持久力，實際上其實都係辛苦咗大家。另一方面，為咗糾正呢種想法，專家訪問咗美國及加拿大嘅多位專業人士，邀請佢哋對不同交歡時間嚟評分，結果得出1至2分鐘屬於「太短」、3至7分鐘屬於「足夠」、8至10分鐘屬於「理想」，超過10數分鐘就屬於「太長」。
小弟一向都好怕發展辦公室戀愛，雖然近水樓台先得月，但係正因為太接近，幾乎日日都見面，大家工作環境相同，你知嘅佢都知，話題自然大減，最慘係分手之後又會面左左。然而，好多戀情卻喺辦公室發生，喺日本亦唔例外，早前當地有一個調查，訪問一眾白領人士，睇吓佢哋發展辦公室戀情嘅時候，情到濃時會喺公司內邊度「偷情」。結果發現最多人喺茶水間搞搞震，之不過都係摸吓手仔啫，話晒茶水間有好多人出出入入嘛！其次係後樓梯，唔少情侶都會借頭借路走去後樓梯會情人，甚至打埋茄輪添！第三位係喺辦公室內暗地掏出情趣玩具展示畀對方睇，呢個做法唔錯，一來同愛人搞吓笑，二來又可以挑起性趣，但係一定要小心千祈咪畀主管睇到囉！
可能唔少男士都有以下嘅經驗，就係交咗女朋友之後，獲女友邀請一齊去佢朋友嘅聚會，去到至發覺相逢恨晚，天意弄人，因為佢身邊班姊妹個個都美若嬌花，身材更勝自己身邊嗰一位！有男士認為錯已鑄成，只好繼續飲恨下去，有男士則不然，一於改向班姊妹埋手！日本早前一個調查喺新宿、涉谷同六本木訪問咗唔少男士，想了解一下佢哋有冇試過同女友嘅女性友人發生過感情，結果發現44%受訪者表示試過。咁佢哋又同女友嘅姊妹做過乜呢？最多人係透過手機同對方曖昧一下，其次就約對方出街，期間亦有拖手，甚至接吻。亦有受訪者表示試過借醉行兇，喺聚會嘅時候扮飲醉酒，借意挑逗姊妹，當對方係女朋友咁上下其手，嘩！好狼胎啫！
撰文：賢