大家同情人互傳情慾短訊要小心，因為有調查顯示好多人都唔小心Send錯畀人，甚至Send咗畀父母添！氣溫對人嘅心情影響甚大，咁究竟喺攝氏幾多度最令女仔有上床意欲呢？一男一女約會，離不開行街、睇戲、食飯，而喺用餐之後又會做乜呢？
相信好多朋友同小弟一樣，喺剛剛識到個女仔嘅時候，都會先發動短訊攻勢，透過連番短訊交流嚟互相了解一下，之後就開始傾電話，而拍拖時就會互傳情慾短訊，你挑逗我，我又挑逗番你，真係諗起都覺得過癮呀！一個美國調查顯示，喺5,800名受訪嘅成年人當中，逾半會傳情慾短訊畀愛人，有四分之一人會以公開其情慾短訊畀朋友欣賞為樂。之不過，開心歸開心，受訪者當中有唔少人玩情慾短訊而做錯事，唔係話佢哋嘅短訊講錯嘢激嬲對方，而係有27%受訪者將短訊傳錯畀其他人，當中更加有5%受訪者將情慾短訊傳錯咗畀父母，尷尬到暈！大家下一次傳訊息畀愛人嘅時候，按傳送鍵之前記得睇清楚喇！
夏天天氣炎熱，面對咁高嘅氣溫，成個人都會汗流不止，心情可謂煩躁不堪，而到咗冬天寒風呼呼吹，心情又換來一片淒楚，好似我呢類溝唔到女嘅肥仔喺冬天就更加覺得淒涼無比。依家天氣咁熱，最好就梗係搵到一個心儀女仔，同小弟一齊留喺屋企一邊歎冷氣一邊睇電視，然後……到時一室皆春，一定洋溢無限溫馨喇。氣溫影響我哋嘅心情，亦會影響到性趣，喺日本就有一個調查指出，男同女會喺幾多室內溫度下激發出性趣。最多男士認為室內溫度為攝氏25至26度，上床意欲就會大增。咁女仔方面呢？佢哋對於溫度嘅要求比較高，因為最多女仔認為佢哋處於攝氏28度，至會想做愛做的事。
早前小弟難得約到傾慕已久嘅女神出嚟食飯，席間互訴心事，女神更自爆情史，坦言愛上一個不該愛的人，現正處於糾纏不清嘅關係當中，講講吓仲喊咗出嚟，搞到我心都酸埋，惟有遞上紙巾，同時安慰一番。事後，小弟將呢件事同班師兄弟分享，有師兄就表示我走雞，因為喺佢咁脆弱嘅時候正係乘人之危嘅好時機，勾引佢去爆房！講就係咁講，但係我實在做唔出，況且食一次飯唔代表佢對我有意思。講開又講，日本一個調查就發現，好多男人同女性去食飯，其實都係為咗飯後去爆房。調查訪問咗1,358名成年男士，發現40歲或以上嘅男士當中，有4成將飯局視為爆房前奏，更加認為女方肯出嚟食飯就等於答應同佢去爆房。而喺20歲至39歲群組當中，只有2成會咁樣諗，到底係年輕一輩想法較為君子，定係新一代已經趨向無性時代呢？
撰文：賢