脫星退休無好結果?

脫星最叻擘大眼講大話,呢頭話引退,夠膽死過一排當無事又返出嚟砌,當然明白佢哋復出嘅原因係為咗搵兩餐啦!然而,唔係個個脫星都肯食回頭草,好似德國妹Scarlet Young引退後轉行賣士多啤梨,話時話,巴打又知唔知曾經紅爆嘅脫星退休後搞邊科呢?

做代言人

真心講,Scarlet Young就算繼續留喺脫星界發展都唔會有好結果,大家先睇吓佢個Outlook,講索冇佢份,架生又唔係正,阿妹當年唯一可取之處係床上敢死隊,再重口味都夠薑陪你癲,所以當年好受歐洲巴打歡迎,加上阿妹識得把握機會,早就加入電視台做真人騷節目主持,成功入屋畀更多人認識,直至上年佢宣布引退,轉行賣士多啤梨,自己仲做埋代言人,據聞生意相當好,難怪引起傳媒又再關注脫星引退後嘅生活。

話實不少脫星都對傳媒講過,引退之後唔想畀人知道私生活係點過,之但係一日脫星一世都係脫星,四仔迷唔會當佢哋係普通人看待,因此當脫星引退後會將所有官網刪除,從此消失於四仔界。

後悔拍四仔

Scarlet Young成功轉型做生意值得恭喜,可惜現實中十個脫星有九個喺引退後生活過得好慘,好似90年代紅極一時嘅美國脫星Shelley Lubben,阿姐不下十次喺訪問中表示色情事業幾乎毁佢一生,自2012年引退後加入Pink Cross Foundation,專為打救色情業界男女,經常出席論壇又發起遊行,不過舊年組織收檔,而佢本人就繼續喺網上發功,開設平台畀曾經加入脫星行列嘅姊妹分享慘痛經歷。

另一位好後悔加入脫星界嘅Nadia Styles,阿妹19歲落場肉搏,一直砌到前年先正式離場,聽聞阿妹因為拍四仔患上抑鬱症,曾經試過自殺,更慘係染上性病,多年嚟賺埋嘅錢用晒喺醫藥費度,早前佢接受宗教團體網站訪問就自爆信教,依家主力喺拉斯維加斯做傳道人。

四仔界確實好陰暗,但亦有人唔信邪,好似當年美國波后Mary Carey,憑住36DD夾爆全球,阿妹自爆最風光時月賺300,000美元,喺2008年自動離座,原因係討厭四仔生活,及後參選加州州長,政綱係同性婚姻合法化以及隆胸徵稅。無奈落敗收場,之後做咗TradioV電台主持節目《Politically Naughty with Mary Carey》,好受歡迎o架!

Sunny Leone最威水

脫星嘅淒涼事講一日都講唔完,但又唔代表做脫星一定冇好下場,你睇印度西施Sunny Leone自離開脫星界後愈撈愈掂,仲威過以前,返家鄉搞生意,又做主持又做大銀幕明星,早前BBC仲報道話佢做才女學人出書寫鹹古,邊個夠佢威呀?

撰文:祖