男人最忌做觀音兵，簡稱兵。不過把口話唔做啫，有得做咪又係舌累飯應，甚至跟多幾個娘娘添。理由好簡單，反正有時間，跟多幾個，時間變得充實，你話幾好呢！話時話，喺情慾字海中，有唔少同兵及Soldier有關嘅詞語，不論做唔做兵，都要認識一下。
做兵已經夠濕滯，仲要做埋「Reserve Soldier」，即係後備士兵，名副其實連上陣機會都冇，係攞景定贈興先？大家唔好扯火住，呢度所講嘅「Reserve Soldier」其實係女士嘅前度男友，亦即係牙籤友，皆因佢唔單止係一位炮友，仲要前度女友有需要搵個膊頭嚟挨吓時，佢就會即刻現身，故此佢同炮友及一夜情對象有分別。如果從呢個角度嚟睇，佢比一般嘅觀音兵好得多，起碼係炮兵、支援兵同參謀兵嘅混合體！順帶一提，英文中亦有「Wounded Soldier」一詞，佢泛指喺行動中受傷嘅觀音兵，例如為娘娘擋醉卻搞到自己斷片，最後被人獨留酒吧；或同娘娘去打羽毛球，不但輸畀追佢班狼狗，仲要搞到拉傷大髀筋呀陰功！
「Crouching Soldier」係指一種可能唔存在嘅性愛體位，傳說中嘅玩法係先讓女伴抱膝瞓喺地上，男方則趴喺對方背上，或以半跪式方法從後挺進，簡單嚟講係一種變種版嘅推車仔。不過點解話可能唔存在呢？皆因呢個體位係由主演過《波叔出城》嘅著名喜劇演員Sacha Baron Cohen，喺其棟篤笑節目《Da Ali G Show》創造出嚟。你知啦！棟篤笑節目不設即場答問環節，事後又冇得追問，於是啲人就憑佢說話嘅前文後理推敲出嚟，因此「Crouching Soldier」實際係點玩，真係只有佢先知。話時話，情色俚語中有個「Sink The Soldier」，並唔係指一種體位，而係指男士自娛，大家千祈咪用錯。
有人話睇AV一定要睇武藤蘭，又有人話睇AV點可以唔睇波多野結衣。不論睇乜嘢女優都好，有位被喻為騎兵片中嘅天后一定唔可以錯過，佢就係擁有35E巨乳嘅女優愛田由！出眾嘅身材固然係佢吸睛嘅本錢，加上佢投身AV界前係一位人氣模特兒，難怪下海時吸引各大AV片廠爭住簽約，最終佢成為老牌大廠Max-A同Kuki聯合嘅專屬女優，喺2004年1月推出處女作《Pichi Pichi》，由於外形吸引加上色氣重嘅演出，令佢奠定癡女形象。2005年佢轉會到另一大型片廠S1，更係到達事業嘅頂峰，獲得Sky PerfecTV成人放送大賞「最佳女優獎」。2007年佢再轉會到Moodyz，同年7月12日宣布引退。
有人話脫星嘅玲瓏浮凸身材夠迷人，因此吸引佢哋買四仔捧場，只係對鍾情美腿嘅四仔迷嚟講，但求有對修長靚腿就已經夠晒滿足。如果你屬於後者嘅話，咁就唔可以錯過美國經典四仔系列《Belladonna's Foot Soldiers》。呢部由脫星Belladonna所開設嘅同名四仔片廠製作合共3集嘅四仔系列，自從2008年推出頭炮作《Belladonna's Foot Soldiers: The Stomping Grounds》，搵嚟Roxy Deville、Lexi Belle、Alexis Texas等人氣脫星演出，加上自己落埋場做埋一份，隨即喺翌年舉辦嘅第26屆AVN頒獎禮中獲得「最佳戀足」作品大獎。食髓知味嘅佢，喺2009年推出續集《Belladonna's Foot Soldiers 2: The Feet Market》，及於2012年推出第3集《Belladonna's Foot Soldiers 3: Don't Tread On Me》同樣叫好叫座。憑住呢個系列大受歡迎，令Belladonna嘅作品被四仔迷視為誘惑嘅代名詞。
撰文：魂