一杯香濃嘅熱咖啡可以話係晨早起身返工嘅打工仔恩物，研究仲發現咖啡能夠幫助男士提升床上雄風添！好多男士都介意女伴嘅前度數目，不過有調查就顯示女士嘅前度較多，婚姻關係反而更加穩固。最近韓國有一個選美比賽，一陣就同大家睇睇一班索到爆嘅韓流美人啦！
做男人最緊要夠硬淨，之不過對於好多打工仔嚟講，一諗起返到公司就要埋頭苦幹，相信想硬起來唔係咁容易，而呢個時候大部分人都會沖杯熱咖啡嚟提神醒腦。美國德克薩斯大學嘅一項研究發現，咖啡所含嘅咖啡因除咗有提神功效，對男士們更加有妙不可言嘅助性功能，原來每日飲兩至三杯咖啡嘅男士，比起唔飲咖啡嘅男士，出現勃起功能障礙嘅機會為低。負責研究嘅Run Wang博士仲大膽咁話咖啡因嘅功效類似壯陽藥物，因為咖啡因令人心情放鬆，壓力減低之餘，仲有暢通血管嘅功用，當男士們受到性刺激，下體能夠快速地充血，床上表現自然更勇猛、更狂野！不過，飲咖啡切勿過量，萬一搞到夜晚瞓唔着，休息唔夠盞影響健康。
做人唔應該只懂得回望過去，活在當下再展望將來最為重要。之不過，好多男人經常回味着過去花天酒地嘅時光，亦同時介意枕邊人嘅過去，對於女伴以前嘅感情生活相當介懷，甚至成日想了解女伴以前曾經同幾多個男人一齊。其實知道又點？最緊要係家陣已經選擇同你一齊咪得囉！仲咁多心做乜呢？如果話你知道佢以前曾經同好多男人一齊，你又會點做呢？早前英國有一個網上調查，想了解一下當地男女曾經同幾多個異性發生過性關係，結果發現男士平均有6.4個性伴，至於女士就叻少少，有7個。不過，受訪嘅女士就表示性伴數目為8個，咁至係最理想，然而，男士們唔好覺得女仔咁諗係水性楊花，因為猶他大學有研究指出，擁有6至8個性伴嘅女性，比起只係得兩個性伴嘅女性，其婚後關係更穩固，更加少出現離婚個案。
近年韓國影星、歌星相當重視香港市場，不時有韓星嚟同粉絲見面，當中以韓國男星為主。每次呢班男星來港，都搞到本地女性相當雀躍，甚至達到瘋狂程度，作為男人嘅我哋當然唔知點解佢哋見到班韓國男星會High得咁緊要，尖叫聲之響亮更甚於叫床啦！不過，男士們都唔使又羨慕又妒忌，因為我哋亦有韓流美人欣賞，一樣可以睇得好High！例如睇吓「Miss Sexy Back 2016」選美大賽啦！呢個選美大賽今年已經係第3屆，經過一輪選拔之後最近就產生出30位入圍佳麗，佢哋除咗身材一流且面孔標致，最重要嘅地方就係佢哋唔一定上圍激凸，但係個個都擁有飽滿美觀嘅臀部！冇錯，呢個選美大賽選嘅係靚股天后，所以位位都係「優質股」，喺8月11日將會面對最後一輪選拔，到時會選出最強7「後」，再競逐冠軍寶座。
撰文：賢