為咗可以喺平面漫畫中，凸顯激盪感官嘅情慾場面，唔少日本成人漫畫家都會喺表情、汁液、肢體等方面下工夫。不過要喺真實同誇張之間取得平衡，則十分考成人漫畫家嘅功力，而月野定規正正可以做到呢點，從佢代表作之一《殘念王子與毒舌女僕》就可以Feel到點樣以液體營造張力喇。
喺1970年出生於神奈川縣嘅月野定規，早喺學生年代已經從事漫畫創作及加入同人漫畫圈，而且仲識咗唔少志同道合嘅漫畫人。當時嘅佢從來冇諗過會成為成人漫畫家，皆因佢嘅創作雖然有少許鹹濕，但內容都係走青少年路線。其後佢以漫畫家助手嘅身份，正式投身漫畫界行列，而喺呢段時間佢仍然繼續同人漫畫創作嘅工作。
佢喺2000年時獲日本出版社Core Magazine邀請，喺成人漫畫月刊《COMIC MEGA STORE》同《COMIC HOT MILK》發表作品，自此月野就活躍於成人漫畫界，但至今月野仍然覺得好神奇，因為佢從未諗過會成為成漫界一員。佢出道初期的畫工仍然有啲稚嫩，角色變形情況時有發生，而人物身材比例亦唔合理，不過經過佢廢寢忘餐鍛煉畫工後，不論角色定構圖都愈嚟愈出色，尤其係情慾場面上嘅處理，更能輕易撩動一眾成漫迷。汁液橫飛、精華滿溢、誇而不浮嘅高潮反應，配合身材激凸嘅女角色，令佢嘅作品更具觀賞性，亦令佢人氣急升。自2001年推出處女成漫單行本《Naive》後，其後推出嘅《PETTY PETIT‧ANGE》、《37℃》、《妄想日記》、《星的王子殿下》等，都成為成漫界中嘅人氣作品，佢亦參加過2009年推出嘅PS2電玩作品《聖誕之吻》漫畫化嘅工作，但係佢仍主力以成漫為主。
《殘念王子與毒舌女僕》係佢喺2013年5月推出嘅第10本成漫單行本作品，被譽為佢嘅代表作之一，收錄咗《殘念王子與毒舌女僕》、《殘念王子與毒舌女僕的假日》、《戀愛禁止！！游泳部》、《LV69》、《有計劃性的利用…》、《酒商的私人服務》、《我的繼哥哥 #1》、《我的繼哥哥 #2》、《我的繼哥哥 #2.5》及殘念系列番外篇《殘念王子與貓耳女僕》等合共12個單元故事，全部作品貫徹佢着重高潮及情慾描寫嘅風格，當中尤以《殘念王子與毒舌女僕》同《有計劃性的利用…》最令人回味。
《殘念王子與毒舌女僕》嘅男主角泉院京也，係日本首屈一指大財團冷泉院集團嘅富二代。自我感覺良好嘅佢，經常被尖酸刻薄嘅毒舌貼身私人女僕朝霧潑冷水，但奇怪嘅係朝霧樂於每日為京也提供銷魂服務，原來朝霧每次同京也曳曳，都會得到額外收入！某日京也邊同朝霧肉搏、邊同佢講覺得暗戀多年嘅藤村美雪，好似對自己有好感，點知朝霧指京也同美雪絕對冇可能。高潮過後，朝霧拎咗封由美雪親手寫嘅信出嚟畀京也，而京也睇完呢封信後，即係嚇到呆咗！究竟信中寫咗啲乜呢？
《有計劃性的利用…》嘅女主角由紀雖然係個樣靚身材正嘅索女，但卻係個冇理財觀念嘅人，最愛買衫嘅佢經常因為使費超支而搞到冇錢畀屋租。呢晚屋主個仔城城又嚟追租，由紀主動挨近城城並同佢講：「今個月就拜託你喇！」跟住就任由城城喺佢身上探索，原來每當由紀冇租交時都會租債肉償，不過就限制城城只能走後門！點知呢晚激戰過後，由紀仍然覺得未滿足，城城見狀竟然挺起兵器直奔正題，令由紀得到前所未有嘅快感！從此愛上同城城曳曳嘅由紀，接納城城以後唔使再畀屋租嘅新提議，而條件就係每日要同佢曳曳一次。
漫畫名稱：《殘念王子與毒舌女僕》
作者：月野定規
出版：Core Magazine
頁數：232頁
撰文：魂