由日本人氣漫畫家士郎正宗創作嘅漫畫《攻殼機動隊》，絕對係經典中嘅經典，難怪最近被改編拍成荷里活真人版電影，由性感女神史嘉娜祖安遜飾演女主角草薙素子。擁有迷人外表嘅草薙素子，性格硬朗，身手不凡，可謂歷久不衰嘅人氣角色。不過今次登場嘅素子模型，點解同漫畫個Look有啲唔同呢？皆因佢係取材自2013年嘅劇場版動畫《攻殼機動隊ARISE》中嘅造型。呢套係前傳作品，為配合時間軸關係，故此佢嘅外形變得年輕。當然作為一個養眼嘅模型，焦點梗係落喺佢迷人嘅身材上，性感嘅衣着下露出大半對車頭燈，相當有睇頭，加埋一對美腿，令觀賞度大大提升。此外，不得不讚設計師嘅心思，呢個戙起腳嘅甫士，不但忠實呈現出素子陽剛嘅性格，怒目而視嘅眼神更係霸氣十足，不論係咪《攻殼機動隊》嘅粉絲，相信都會有興趣。