四仔喺四仔廠拍正常吖，但唔知巴打有冇留意，近期四仔多咗好多外景，喺不同豪宅內砌砌砌，莫非片廠自知銷量走下坡，要諗多啲新花臣取悅觀眾？你就想，今期美國有消息指，原來有不良四仔廠透過租屋網站，租用不同地區房屋，然後拉大隊去拍四仔，最得人驚係喺屋主不知情下進行，即係話，你屋企隨時變公眾炮房呀，係咪驚驚先？
點解四仔界要咁無賴？綜合當地報道有兩個原因，首先因為幾年前美國加州通過新法例Measure B ，規定所有四仔色情電影表演者拍埋身肉搏時必須使用安全套，所謂道高一尺，魔高一丈，四仔廠就喺加州附近嘅地區租屋開片，藉此避過法例，咁搵租屋網就最啱啦！有不少「受害」屋主曾經向傳媒投訴話試過租完間屋出去，全屋都「滑潺潺」仲有好多用過嘅潤滑油包裝、情趣內衣及玩具等，亦有人話喺社交網見到自己間屋嘅相，但主角竟然係男女脫星囉！第二個原因係不少「個體戶」形式細廠為增加新鮮感吸引四仔迷，租用豪宅拍攝四仔，比長租片場更划算喎！而當地傳媒就踢爆，其實租屋拍四仔早喺2011年出現，只不過係愈嚟愈多人踩界，NBC傳媒就此事更訪問Lucas Entertainment嘅老闆Michael Lucas，當事人表示喺四仔界廿年，租屋拍四仔係好普遍不過嘅事，目前為止都冇問題發生喎！未發生唔代表冇手尾跟，事關四仔製作必須申請許可證，否則有機會罰款$1,000美元或面臨6個月監禁。奉勸片廠都係安分守己，無謂搞到四仔迷冇四仔睇，屋主又唔肯對外租屋，咁就齊齊冇運行啦！
撰文：祖