甜美笑容固然可以打動唔少男士嘅心，尤其係索女，相信冇邊個男人唔會畀佢哋嘅笑容所融化，而內地人氣模特兒陳芊瑜唔單止笑容甜到漏，玲瓏浮凸嘅身材更係輕易成為男士嘅焦點。
今年24歲嚟自浙江杭州，英文名叫Sherry嘅陳芊瑜，單係睇佢36、26、36嘅三圍數字，就知道佢係一個天生嘅尤物。不過，如果以為佢只係識得一味賣弄身材，兼且狂騷事業線嘅話，咁就大錯特錯，事關佢最大嘅賣點並非迷人嘅胴體曲線，而係甜美嘅笑容。事實上，早喺5年前就已經從事模特兒工作嘅佢，就憑住呢種令大家着迷嘅笑容，而喺模特兒界成名，並且獲得唔少嘅商演機會，當中包括時裝、潮流、化妝等商品推廣會中亮相，又喺各類型嘅雜誌中登場。此外，佢又經常為商品拍攝平面廣告，工作範圍相當多。
如果細心啲睇嘅話，便會發現佢嘅身材固然係大家嘅焦點，只係令佢工作機會不斷嘅主要原因，係同佢青春可愛兼且陽光味爆燈嘅笑容有極大關係，尤其係當佢笑起嚟所露出嘅一對兔仔牙，令人感覺到佢天生嗰種純真及清純味道，而呢種氣質正正係現今內地模特兒界中相當少見。除咗積極喺模特兒及寫真界發展外，具有商業頭腦嘅佢，喺網絡購物平台上出擊，開設網絡護膚品生意，以自己作為生招牌，令佢所介紹嘅護膚產品更具說服力。阿妹咁有生意頭腦，邊個仲夠膽話佢只係識得賣弄身材而冇頭腦呢？
雖然佢積極營運網絡護膚品生意，但佢仍然不忘老本行，早前佢就到泰國布吉島參與寫真工作。咪以為去外國影寫真好簡單，因為內地模特兒想出國拍攝寫真，首先要獲得粉絲嘅贊助至得，若然籌唔到目標費用，最終只會告吹。佢最終能夠成行，不但證明佢嘅魅力有幾咁吸引，更重要係睇得出佢相當受粉絲嘅歡迎。
為咗保持誘人體態，佢亦要抽空到健身室健身。可能有人覺得，其實佢嘅外形已經夠晒吸引，使乜花咁多時間鍛煉呢？如果咁諗就錯喇！皆因佢嘅身材係靠後天鍛煉出嚟，加上佢自稱係個冇乜恒心嘅人，故此只好不斷努力先至可以保持迷人身段。平時嘅工作已經夠晒忙，仲要花時間去做其他嘢嚟保持美態，真係好辛苦呀！
一直以嚟密謀向影視界發展嘅佢，仲要抽空練習演技，否則好難圓佢呢個心願。去年9月初，佢就參加咗電影選角會，希望可以喺大銀幕上亮相。雖然未知最終結果係點，但憑住佢嘅努力，不但已經獲得唔少粉絲支持，而且終有一日佢一定可以達成夢想，事關以佢甜到令人心動嘅笑容，試問有邊個男人唔畀佢融化呢？
簡介：陳芊瑜唔單止外在條件出眾，仲相當有生意頭腦，唔經唔覺佢嘅網上護膚品生意已經做咗兩年，果真係營運有道。不過對一班粉絲嚟講，最希望知道佢嘅動向外，梗係希望佢能夠發放多啲福利，唔知佢幾時又會上載迷人嘅靚相同大家分享呢？
網址：www.weibo.com/zcmb
出生地：浙江杭州
身高：162cm
三圍：36、26、36
撰文：魂