咪以為成人遊戲迷偏愛真實風格嘅遊戲，查實有調查發現萌味爆燈嘅作品，先至係主流王道，而日本著名成人遊戲商Whirlpool為咗滿足如此龐大嘅市場，推出以萌為主題嘅作品《World Election》。故事發生喺一個巨大嘅大陸之上，由5個唔同嘅國度所瓜分，當中分別有暗無天日嘅黑暗國度「劫魔界」、唔存在有生命者嘅機械文明「機械帝國」、寧靜嘅神與天使之國「天樂園」、原始世界兼獸人族樂園嘅「大自然鄉」同埋人類所居住嘅「人間界」。本嚟呢5個唔同文明嘅國度，卻喺一次名為「變革之日」嘅事件中統一。經歷咗20年，由世界政府所管治下所帶嚟嘅和平日子後，卻因為發現喺「變革之日」同時誕生具有特殊能力嘅新人類neo's，令世界再次出現暗湧。身為neo's之一，並且就讀於專為新人類而設嘅國際學園嘅男主角，某日見到一顆隕石突然墜下，跟住一位謎之少女出現面前，對方自稱係呢個星球嘅終結者之後就暈咗。自此之後，男主角每日都要喺少女嘅鞭策下，同佢一齊諗辦法點樣毀滅呢個星球，過住既香艷又刺激嘅生活。