一味靠運 邊有得搵

雖然發達唔多唔少要靠運氣,但係更加需要努力,只係一味靠運氣嘅話,名副其實係等運到!當然,努力亦唔可以好似盲頭烏蠅亂咁衝,一定要有正確嘅方向至得,否則只會撞板多過食飯,最終落空收場。

殃及池魚

須知道提供色情服務喺台灣係違法,故此經常聽到有關當局取締呢啲色情場所嘅新聞,最近有單新聞幾特別,話說一間位於高雄嘅色情養生館之所以被查獲,竟然係同一宗求愛不遂嘅感情糾紛有關。呢間打着香草保健旗號嘅養生館,搵嚟3位原籍內地並已領有台灣身份證嘅兼職女服務員,由1,600台幣(約400港元)起嘅價錢提供半套服務。事實上,呢間養生館不但經常被人檢舉,並且已經被查獲過幾次,而喺最近一次突擊行動中,佢哋又再次被查獲。有人就問被捕嘅朱姓女服務員,點解佢哋呢間色情養生館屢次被人檢舉,佢就爆料話因為有某位玩家苦苦追求一個女服務員,但卻一直求愛不遂,於是佢好唔忿氣檢舉間店,而最慘嘅就係嗰位女職員冇畀人拉到,反而朱女卻次次斷正,真係殃及池魚!不過呢個只係佢嘅片面之詞,至於真正原因就冇人知喇!

超素人風俗孃

日本AV界嘅素人,即係從未從事過AV女優工作咁解。如果按呢個定義去推敲嘅話,理論上喺風俗店中見到標榜為素人嘅風俗孃,應該係指從未從事過呢種工作嘅囡囡,而最近日本風俗店就出現一種叫「超素人」嘅風俗孃噃!據一間位於群馬縣、有提供超素人嘅風俗店負責人解釋以往所謂素人,表面上係從未做過風俗孃,但實際上早有喺風俗店工作嘅經驗,因此唔多唔少都已經習慣咗風俗孃嘅工作生態及看透世情,亦因為咁嘅緣故染有一定嘅風塵味。而從未做過風俗孃,又冇喺風俗店工作過嘅新進風俗孃,為咗凸顯佢哋嘅清純味道,因此以「超素人」嚟稱呼佢哋。由於呢種未經歷過風塵嘅風俗孃,對某啲玩家嚟講別有一種吸引力,故此價錢比素人貴幾成,仍然深受玩家歡迎。

偽科技公司

之前講過有內地囡囡為咗提高身價,搵團隊幫佢哋包裝成模特兒身份,同時透過網絡搵老細,名副其實係一條龍服務,而化身成模特兒嘅囡囡收入亦提升多倍!最近呢啲團隊開設網絡科技公司,好似喺湖北京山就有間網絡科技公司,佢哋嘅服務包括網絡發布訊息、安排交易地點、宣傳相關色情服務、囡囡管理等。另外,佢哋會向客人提供消費價格、營業時間等資訊,最厲害之處係佢哋有完整兼且嚴謹嘅架構,如果唔知內情嘅話,真係以為佢哋係一間有規模嘅網絡科技公司。不過有關當局經過兩個月嘅調查,喺掌握到大量資料同證據後,成功將呢間公司取締。

撰文:魂