成事固然開心，但未成事都令人振奮呀！講緊係四仔廠Evil Angel唔再忍，企出嚟挑戰霸權，理由係現今智能手機兩大陣營Android同iOS，前者就隻眼開隻眼閉，容許鹹App如《MiKandi》等存在，但就封鎖提供色情資訊，後者就更加唔使講，連上架嘅機會都冇，咁多年來四仔業界都嘈過千百次，更有傳當年要訴諸法律解決，可惜事件不了了之，而一眾脫星亦出言表示，Android及iOS表面滿口仁義道德，實情係帶頭歧視色情演員咁話！
任你一邊嘈，手上咪一樣用緊佢哋嘅電話，所以即使四仔界玩罷工都唔會令兩大手機平台心軟，除非你有方法繞得過佢哋「入機」啦！據聞Evil Angel行政財務總監（CFO）Adam Grayson就同當地手機網絡供應商T-Mobile傾偈，話可以向呢個網絡商嘅用戶直接提供Evil Angel色情內容喎！Adam接受傳媒查詢時就好勞氣咁話，色情行業經常被無故針對，視性為魔鬼，但一講到同網絡商談話內容時，佢就笑騎騎話手機界將有重大改變，更引述網絡商工程師Grant Castle話，要喺兩大手機平台上睇四仔官方鹹App簡直好似撳個掣咁簡單，現階段最大困難只不過係網絡商未能穩定做到4K畫質，假如要流暢頂多可做到480p標清質素，雖然外界都唔係好明點解做唔到高清，但巴打一定好希望「有關方面」講多啲同再講多啲，最好就日日都講，炒熱個話題，咁就好快會成事喇！
撰文：祖