師傅成日教我，出嚟社會做事最重要就係唔好四處樹敵，最好做到八面玲瓏，面面俱圓，咁先有前途。講得好有道理，不過暫時徒弟仔我就未做得到，所以要向鈴木千奈美好好學習一番，因為阿妹真係能夠做到瓣瓣掂，認真係叻女。
好多加入日本寫真界嘅新人，希望以自己嘅美貌同身材吸引注目，有番咁上下人氣之後就跳去演藝界，一旦成功轉型做演員，佢哋就會決絕地同性感寫真講拜拜。好似人氣女星綾瀨遙咁，家陣咁紅你想佢好似以前咁拍水着寫真都幾難啦！其實將寫真界當成發展演藝事業嘅踏腳石呢個想法根本就係錯，因為拍寫真同演戲絕對可以雙軌並行，成功嘅例子就擺在眼前，鈴木千奈美咪就係囉！
今年26歲嘅千奈美生得甜美可人，面圓圓配上精緻五官可謂充滿親和力，無論男女對佢都唔會有抗拒。除咗樣貌討好，千奈美更加擁有一副曼妙身材，身高5呎6吋，胴體鮮嫩無比，加上32E-23-34三圍，有前有後且充滿曲線美，男人見到佢又點會唔冧，直頭想同阿妹抱抱添啦！
2008年千奈美初次以模特兒身份喺時裝雜誌登場，不過當時要兼顧大學課程又要做模特兒，的確令千奈美忙得緊要，更加受到父母嘅反對。不過，千奈美最後都係咬緊牙關捱落去，一邊讀書一邊工作。幸好，千奈美總算捱出一點甜頭，翌年佢成功喺206位參加者當中脫穎而出，奪得東麗水着競賽冠軍。
完成學業之後，千奈美全面向寫真界同演藝界進軍，由於阿妹有學識，相貌又夠親切，故獲電視台多次邀請佢做女主播，報道天氣同多方面資訊，亦演出過唔少電視劇，例如《華和家四姊妹》，最近就有以釣魚為題材嘅《釣魚迷日記 新入職員濱崎傳助》，電影作品亦有叫好又叫座嘅《永遠的0》。除此之外，相當有觀眾緣嘅千奈美可謂八面玲瓏，喺各方面都咁受歡迎，活動剪綵、開球禮都有佢份，最近仲為龜有警視廳擔任一日署長，向大眾宣揚守法訊息，阿妹你咁多瓣數，點夠你撈呀！
簡介：鈴木千奈美日日都咁忙碌，工作做個不停，如果大家想知道阿妹最近又去咗邊度開工，追住佢個博客嚟睇就包冇走雞！當然唔少得欣賞千奈美嘅自拍靚相啦！
網址：http://ameblo.jp/suzuki-chi/
年齡：26歲
身高：5呎6吋
三圍：32E-23-34
撰文：賢