朱若慕遊戲人間

以前話一個人遊戲人間,唔多唔少有種貶義嘅感覺,但係今時今日就唔同講法,皆因打機都可以搵食兼名成利就。對於內地人氣嫩模朱若慕嚟講,進軍遊戲界唔單止係佢其中一個事業發展方向,以認真嘅態度加上遊戲嘅心態,更係佢喺模特兒界闖蕩嘅最佳寫照。

美態獨特

近年時興嘅一句說話「認真便輸了」,若然換個角度嚟睇,可以理解成凡事唔使太過執着,反而以輕鬆心態嚟面對,會有令人喜出望外嘅收穫。如果以呢個定義,套用喺嚟自上海嘅24歲模特兒朱若慕身上,就最適合不過。英文名叫Akiki嘅佢,不但擁有迷人五官,更有一副火辣嘅魔鬼級身材,一對36吋巨乳嘅魔力,簡直令人神魂顛倒,配合埋佢性感演出嘅寫真,輕易成為大家嘅焦點,更勾起男士種種幻想。

畢業於上海濟光學院經管系嘅若慕,擁有專業嘅經濟及管理學知識,大膽講句縱然佢唔喺模特兒界發展,都能夠喺商界搵到自己嘅一片天。早喺讀書時期,佢已經從事模特兒工作,除咗拍攝寫真外,更經常喺平面廣告上亮相,佢坦言當時以認真嘅態度及輕鬆心態面對工作,令佢喺鏡頭前展現出獨特美態。由於佢表現出色,其後被模特兒經理人公司睇中,正式成為全職模特兒。喺2011年上海遊戲展ChinaJoy中,若慕成為內地網絡遊戲商嘅首席Show Girl,憑住出眾嘅外形及迷人曲線,成功走出網絡寫真界,成為大家所認識展場模特兒。

喜愛打機

如果話每個人嘅人生中,總有一個轉捩點,若慕擔任遊戲商Show Girl,就改變咗佢嘅發展方向。事關人氣驟增嘅佢,唔單止繼續寫真拍攝工作,更開始將事業伸展到網絡遊戲中,單單喺呢一年,佢已經為多個網絡遊戲進行網絡推廣,並且擔任網遊代言人。不過佢並唔似一般模特兒咁,只係拍攝造型照及宣傳,作為遊戲迷嘅佢仲會自己玩埋一份,並且同一眾網遊迷對戰,偶爾仲會將遊戲過程放上個人微博,同粉絲分享箇中樂趣。從呢點可以推敲出,若慕不但係個遊戲迷,更對遊戲代言人嘅工作樂在其中。

除咗積極進軍網遊界外,佢經常參與各種時裝表演活動,大家咪以為佢所有衣着都係由贊助商提供,因而冇時裝品味,實情係佢有自己一套着衫心得,經常配搭出適合個人風格嘅服裝,此外,佢亦係一位專業級數嘅化妝師。當然,阿妹佢嘅實力唔止咁少,如果想知道佢更多內涵嘅話,大家不妨去佢個人微博,用自己嘅眼睛嚟認識佢喇!

個人微博

簡介: 朱若慕人靚身材正,又鍾意打遊戲機,令佢喺遊戲界有唔少粉絲,當然,也有男士被佢出眾嘅身材迷倒,而成為佢嘅忠粉。至於大家想知道阿妹有乜嘢過人之長嘅話,就要去佢嘅微博睇吓喇!

網址: www.weibo.com/jiejieloveyamap

朱若慕Profile

出生地:上海

身高:168cm

三圍:36、25、36

撰文:魂