點樣先至叫做辣模？除咗要有迷人嘅樣貌、前凸後趷嘅身材同敢於性感示人外，最重要就係舉手投足之間，都能夠表現出無比自信，呢啲先至係真正火辣模特兒，好似內地人氣Model曼蘇拉娜咁，不但喺鏡頭前展現過人魅力，更憑住出色嘅舞姿成為炙手可熱嘅派對女王。
今年24歲嚟自北京嘅曼蘇拉娜，英文名Alyssa。大家唔識讀佢個英文名一啲都唔緊要，只要認住佢個樣同埋玲瓏浮凸嘅身材就已經足夠。呢位從事模特兒工作多年嘅辣模，除咗憑住超性感嘅火辣寫真，令佢成為網絡紅人，兼且係唔少網民心目中嘅性感女神外，更因為佢喺模特兒工作上豐富嘅經驗，同埋超高嘅曝光率，成功躋身內地著名模特兒行列。喺佢投身模特兒界嘅日子中，從事過相當多類型嘅工作，當中包括平面廣告、電視廣告、遊戲代言、網購女郎，甚至做過禮儀小姐。至於同佢合作過嘅商業品牌更係有排數，包括有手機遊戲、婚紗、汽車、電子產品等。佢人氣咁高，自然趁住呢個機會進軍影視界，而自佢出道以嚟，先後喺多套MV、電視劇、微電影以及電影中亮相。另外，佢仲係內地表演團體嘅成員，喺各種演出場合中，憑住過人舞技及火辣身材，成功吸引觀眾嘅目光。點解佢舞技如此出色？原來佢畢業於中央民族大學舞蹈學院，經過長期鍛煉嘅佢，舞技自然有番咁上下。
雖然佢喺模特兒、影視及表演界取得優秀嘅成績，但係對於一位有魄力同有野心嘅人嚟講，呢啲收穫並唔能夠令佢滿足，故此喺2014年春節後，佢成立一個名為「Party Queen」嘅派對組合。所謂派對組合，係喺派對中透過性感、激情及音樂等元素，並且以唔同種類嘅演出，例如跳舞、遊戲同行騷等，將派對嘅氣氛推至頂峰。以佢為核心嘅團隊，仲搵嚟一班迷人索女做成員，每人分派唔同嘅角色，例如DJ、歌手、舞蹈員等。為咗可以令演出更加吸引，佢仲搵人氣歌星客串。佢花費咁多嘅心血同時間喺組織派對統籌嘅工作上，除咗因為有「錢」途外，更因為佢希望能夠透過呢個機會，令佢喺商場上有突破性嘅發展。須知道一般嘅模特兒成名後，最多只係拍劇同拍戲，頂多都係做埋歌手，只係佢卻覺得呢條路太過狹窄，既然佢擁有出色嘅舞藝，加上以前累積落嚟豐富嘅表演經驗，點解唔索性向商界發展，咁樣仲有更大嘅發揮空間。呢種自信及計劃，足以證明佢係個既有外在美又有頭腦嘅辣模。
簡介：曼蘇拉娜家陣嘅發展固然可以用百足咁多爪嚟形容，只係佢喺百忙中卻不忘同粉絲進行網上互動，透過個人微博分享自己平日生活點滴，同時向大家撒嬌，搞到粉絲冧到爆，當然最大嘅福利就係佢經常上載最新嘅性感寫真，你話叫人點可以唔成為佢嘅追隨者呢？
網址：www.weibo.com/u/5704822161
出生地：北京
身 高：168cm
三 圍：34、24、35
撰文：魂