張已桂鬼味昇華

妖精同魔女已先後登場,今日就有請「鬼」火咁靚嘅內地人氣辣模張已桂迷惑大眾,佢予人一種與別不同嘅感覺,皆因佢唔係純種中國美女,而係一位混血索女,散發出鬼鬼哋嘅味道,加埋一副魔鬼身材,叫人一見傾心。

內外兼備

英文名叫Miki嘅辣模張已桂係一位中葡混血兒,外表鬼鬼哋,加上標致嘅五官相當吸引,只係講到佢最吸睛嘅部位,莫過於心口一對33D車頭燈。甫出道佢就走性感火辣路線,喺寫真當中大方地將誘人身材騷畀大家睇,試問又點可能唔走紅呢?難怪佢被網民給予「張大Mi」(Mi即係咪咪嘅同音,意思係指胸部)嘅外號,足證佢嘅魔鬼身材有幾咁令人着迷。如果話佢憑住網絡人氣而成名,其實並唔係咁恰當,事關早喺2009年時佢參加首屆東方美少女選美大賽中勇奪冠軍,其後喺多個選美比賽中亦獲得佳績,而2013年喺上海舉辦嘅電玩展ChinaJoy中,更奪得最美Show Girl嘅殊榮,證明已桂嘅天使面孔同魔鬼身材嘅魅力,早就獲得大家認同。除咗外在美,阿妹仲相當有內涵,擁有內地著名學府同濟大學學歷嘅佢,其後又喺上海戲劇學院修讀演技,名副其實係內外兼備。

多棲發展

當大家睇到已桂喺戲劇學院修讀演技,都會明白到佢唔甘於只係喺模特兒界發展,事實上,喺2009年選美比賽奪冠嘅翌年,佢已經踩入影視界,演出多套電視劇。由於當時佢自覺演技幼嫩,故此到上海進修演技,而為咗提升實戰經驗,佢參加舞台劇《別墅出讓》、《家梅》等演出。及至2013年終於畀佢等到機會,喺微電影《守愛》中擔任女主角,今年更獲得電影演出嘅機會添。多年嘅努力不但冇白費,亦證明佢嘅演技已臻成熟。不過,佢嘅野心並唔僅止於此,縱然佢喺模特兒同影視界取得優良成績,佢仍唔畀自己發展嘅步伐停落嚟,原來暗中練習歌唱技巧嘅佢,早就有進軍樂壇嘅計劃。須知道內地不乏唱得又睇得之人,如果冇番咁上下實力嘅話,想冒出頭實在艱難。機會總係留畀有準備嘅人,喺今年6月已桂推出單曲作品《甜言蜜語》,透過歌詞訴說無疾而終嘅愛情,演繹當中嗰種無奈同失落,作為一個新進歌手,能夠表達到咁難嘅情感,絕對值得讚賞!

個人微博

簡介: 張已桂唔單止係專業嘅模特兒同演員,更係一個充滿愛心嘅索女,事關佢曾經為咗貴州山區嘅公益活動而努力,真係愛心爆棚。如果想了解佢多啲嘅話,就要去佢嘅個人微博度睇吓喇!

網址: www.weibo.com/u/2139168374

張已桂Profile

生地:上海

身高:172cm

三圍:33、23、34

撰文:魂