唔知大家仲記唔記得細個時，同你一齊玩泥沙嘅玩伴呢？相信唔係好多人記得。為咗可以重拾大家兒時回憶，日本著名成人遊戲商Lump of Sugar便推出名為《孩子們的遊戲》嘅新作，實行集回憶、懸疑同愛情於一身，讓玩家喺遊戲中透過解謎嘅玩法，慢慢揭開一層又一層嘅男女神秘關係。故事講述男主角丹生清澄自細被詛咒困擾，卻一直苦無辦法解咒。正當佢決定背負住呢個詛咒度過一生之際，突然遇到一個神秘美少女。對方話只要同佢喺埋一齊，透過特定嘅儀式配合埋詛咒，就可以發動特別嘅法力，而遇到唔同美少女所起動嘅儀式，詛咒便會產生唔同嘅法力，以滿足丹生唔同嘅夢想。不過最令丹生覺得奇怪嘅係，每位遇上嘅美少女都有種似曾相識嘅感覺，經過一番相處後，先至發現原來佢哋係早已被佢遺忘嘅兒時玩伴。究竟丹生清澄所受嘅詛咒，同呢班美少女有冇關係？一切就要等大家慢慢解開謎團喇！