日女易思遷背夫偷漢

老婆收埋私己錢絕對係好平常,但係日本嘅老婆唔單只鍾意儲起私己錢,仲有唔少會見異思遷,做出背夫偷食嘅行為。英國係唔少香港人移居同留學嘅熱門地,同時識番個英國妹亦係好多港男嘅夢想,不過生得高大嘅男子漢至係英女嘅最愛,港男未必有運行。男女身體構造不同,想達到性高潮嘅方法亦唔同,調查就顯示能夠令女性得到高潮嘅最佳辦法原來係用口。

偷食比率高

雖然話夫妻之道在乎坦誠,有咩事最好就係三口六面講清講楚,咁樣大家相處都唔會有咁多芥蒂喇。之不過,事實上唔係樣樣事都要交代得清清楚楚,畀番多少私人空間大家亦未為不可,好似老公曾經有幾多個女友,又或者以前有冇嫖過妓等,如果老公坦白作答肯定嗰晚唔使瞓,又或者老婆畀老公瞓,但係可能從此一睡不起。當然,老婆亦會對老公有所隱瞞,最近日本電訊商NTT就訪問咗約2,103名已婚女性,問及佢哋有咩事隱瞞配偶,有百分之二十六表示自己瞞住老公收埋私己錢,呢個好正常。不過就有百分之二十表示曾經見異思遷瞞住老公同其他男人鬼混,比率都幾高喎!睇嚟日本男士真係要好好地反省一下係咪自己「交功課」交得唔夠勤力喇。

英女愛高大男

小弟身邊有好多富貴朋友,雖然個人冇咁嘅福分去沾佢哋嘅貴氣而全家富貴,但係久唔久上佢哋屋企食餐飯都唔錯,至少唔會粗茶淡飯,仲有佢哋嘅工人姐姐服侍。提到印籍同菲籍姐姐,我對佢哋有莫名嘅好感,因為佢哋成日都大讚我皮膚白又靚仔,見到我就嗒晒糖。我梗係有自知之明啦,但係不同國家民族都有其審美標準,大家唔好以為我吹水兜個圈話自己靚仔受歡迎呀!最近就有調查顯示英國女仔比較鍾意生得高高大大嘅男仔。調查訪問咗2,544個英女,睇吓佢哋覺得邊一種男仔喺性方面比較滿足到佢哋,當中有13%答身高逾6呎嘅男仔喺床上表現最好,10%就答身高矮過5呎8吋但係擁有健碩身材嘅男仔最勁,即係話我呢啲又矮又肥嘅男仔如果想溝英國女仔機會好低。

用口最爽

現代人要尋求房事快感真係好方便,因為大家都可以喺坊間買到款式多不勝數嘅情趣用品,單身人士要自己一個人獨樂樂都玩得好開心。但係冷冰冰嘅死物點都及唔上有血有肉嘅真人對手,之不過要令女方達到高潮卻唔係咁簡單,用邊一個交歡方式先可以令女方高潮迭起呢?早前有調查報告話94%受訪女性表示暢遊後花園能夠達到性高潮,之不過美國網站FiveThirtyEight就此進行過研究以反駁呢個結果,原因係此玩法實在唔係好多女性能夠接受,故呢個結果的確存疑。網站經調查過後,發現實際上只有31%女性鍾意呢味嘢,有80%女性表示男人為佢哋口舌服務最能夠產生高潮,其次係埋牙交歡以及互相玩手作仔,男士們下次記住唔好浪費自己嘅三寸不爛之舌喇!

撰文:賢