有人話年紀大機器壞，但係隨住大家吸收嘅營養及養生知識豐富，好多70歲老人仲係「有心有力」。胸圍係人類重大發明，除咗可以保護女性嘅胸部，據聞仲有預防下垂嘅作用，之不過有研究表示唔戴胸圍一樣冇問題。安全套係避孕同預防性病嘅好幫手，好快我哋就有更方便嘅產品──噴霧式安全套可以用喇。
胸圍係絕大部分女性嘅生活必需品，如果冇胸圍保護住雙峰，要佢哋真空外出，肯定周身唔自在，更怕畀人睇到透點嘅狀態。但係，唔好話我鹹濕，絕對建議女士們可以考慮唔戴胸圍，我只係引述專家嘅意見咋。法國嘅運動醫學專家Jean-Denis Rouillon進行過一個為期十五年嘅長時間研究，搵來330名年齡介乎18至35歲嘅女士協助。喺研究嘅日子當中該班女士唔需要戴胸圍生活，專家定期為佢哋量度胸部，發現平均每年胸部只會下垂7毫米，同有戴胸圍嘅女性相若，但係堅挺度及彈性度卻可以保持理想水平。而綜合專家意見，乳房冇胸圍拘束可以得到更多運動嘅機會，更能保持健康狀態。另一方面，有人話胸圍可以減輕腰背痠痛，專家就話冇關係，唔戴胸圍嘅女士通常都冇發現有此問題喎！
小朋友係社會未來嘅棟樑，而老人家亦曾經係社會棟樑，作為年輕一輩好應該善待長者以報答佢哋對社會作出嘅貢獻，故此有好多社福組織向政府表示希望增加生果金同生活津貼嘅意願。老實講，呢點小弟都好認同，但除咗金錢之外，點解唔考慮一下搞多啲活動陪老人家呢？另一方面，又有冇方法照顧到老人家嘅生理需要呢？日本同香港一樣都面對人口老化問題，據早前日本性科學會嘅調查發現，60至69歲嘅男性有28%希望同伴侶上床，而70至79歲嘅男性更高達38%有同樣意願，比起2000年進行嘅同類調查，分別高出14%以及25%！可見現代長者比以前更有性趣，而研究者表示當中嘅原因同長者比十多年前更加健康有關，至於點樣幫佢哋解決需要，就留待有關方面慢慢諗喇。
早前有調查發現好多男士都注重交歡時嘅安全性，上床會使用安全套，之但係佢哋就唔了解自己嘅寶貝以及安全套嘅尺碼是否合適，搞到經常買錯套。老實講，安全套好多都係來自外國，外國人嘅尺碼同我哋的確有分別，但係買安全套之前又冇得試戴，要買到完全合身嘅真係幾難。不過，喺不久嘅將來問題可以迎刃而解，因為噴霧式安全套即將面世。早於2006年，德國教師Jan Vinzenz Krause就忽發奇想，諗出可以用噴霧式裝置，於下體噴上膠質形成保護膜，就可以造出一個完全貼身嘅安全套。之不過，搞咗兩年之後，由於種種技術問題未能解決故停止研發。然而，近期一位喺紐約讀設計學嘅學生Michele Chu決定接力研發呢個劃時代發明，而佢仲表示充滿信心，不過到底幾時面世就仲未有時間表。
撰文：賢