有人話北京人嘅性格坦率又開朗，如果係咁，呢種特質喺內地人氣嫩模劉婭希身上便可充分地展現出嚟。呢位地道嘅北京姑娘，不但擁有北京人嘅個性，更憑住出眾嘅樣貌及玲瓏浮凸身材，成為網上人氣模特兒，亦係位著名嘅Show Girl。
今年23歲，原名劉莹，英文名Avine嘅劉婭希，自出世以嚟都居於北京，難怪佢稱自己係個地道嘅北京姑娘。雖然喺2013年7月先至從北京聯合大學畢業，但佢嘅模特兒資歷卻早喺畢業前開始，不但經常為商品拍攝廣告硬照，又從事私人拍攝工作，而及至畢業之後便正式投身職業模特兒行列。憑住出眾嘅外形及開朗嘅性格，不但有唔少曾經同佢合作過嘅攝影師，大讚佢嘅專業態度，亦有唔少網民為佢坦率個性而着迷。好似佢曾經喺網上自爆有個劉考拉（考拉係Koala嘅普通話音譯，意思即係樹熊）嘅外號，原因係佢除咗鍾意瞓覺，更好似樹熊咁鍾意攬住啲嘢嚟瞓，甚至分享埋佢難睇嘅睡姿畀大家，呢種咁唔顧形象嘅表現，贏得大家對佢嘅熱愛。
事實上，佢嘅出道歷程甚為順利，除咗喺網上贏得大家支持外，佢先後擔任中國國際網絡文化博覽會、中國電玩展Chinajoy等嘅Show Girl，同時又以車模身份喺北京車展、汽車發布會等登場，此外又替網絡商品平台、婚紗店、品牌內衣、時裝雜誌擔任平面模特兒。除咗喺模特兒界發展外，佢又喺網絡節目上亮相，人氣亦日漸提升。喺去年，佢更入選百度90後美胸美女團體F90嘅第一期成員，以網絡偶像身份進行多元化嘅商業推廣活動，憑此身份被更多人所認識，亦令佢嘅工作量大大增加。既然佢喺模特兒界嘅發展平步青雲，唔知呢位擁有天使面孔及魔鬼身材嘅索女，會否密謀向演藝界進軍呢？佢話暫時仲未有咁嘅打算，事關佢自細最大嘅夢想，其實係成為一位超模，故此現時朝着呢個目標而努力。
劉婭希唔單止有樣有身材仲要有學歷，加埋佢開朗嘅個性，點可能唔成為男士嘅寵兒呢？想了解多啲呢位索女嘅私生活，可以去佢嘅個人微博，仲有機會睇到佢最新上載嘅性感靚相添！
網址：weibo.com/u/1147018820
出生地：北京
身高：170cm
三圍：35、24、35
撰文：魂