經常聽到一啲人氣極高嘅性感模特兒，被冠以宅男女神之名，其實女神亦有好多種，當中有純情、可愛、嫵媚及火辣等，而近年同被公認為宅男女神之一嘅孟曉藝，按佢玲瓏浮凸身材兼且大膽演出嚟分類，相信非火辣莫屬。
作為網絡紅人兼被授以宅男女神之名，嚟自北京嘅辣模孟曉藝嘅外形，確係有其誘人之處。35、24、36嘅魔鬼級三圍數字，加上俏麗嘅樣貌，單憑咁出眾嘅先天條件，已經足以成為男士嘅焦點，配合其火辣嘅寫真不但展露佢玲瓏浮凸嘅身材，極具挑逗性嘅表情更係令人留下深刻嘅印象，難怪佢嘅寫真紅爆網絡。其實早喺佢成為網絡紅人之前，佢誘人嘅風姿早已引起大家注意，事關佢先後喺全國平面模特大賽中獲得新星獎，又憑住黃金比例嘅身材，喺傳媒風尚大典年度風雲榜中，獲得最佳上鏡獎。此外，佢亦經常喺時尚、潮流、男士等雜誌封面上亮相，又喺2014年中國遊戲展ChinaJoy擔任Show Girl，從各種成績可睇出，佢模特兒形象備受大家肯定。
除咗模特兒工作出色外，喺2011年擔任深圳大運會宣傳形象大使之餘，更着力向演藝界發展，曾以演員身份喺多套電視劇同電影中登場。喺好多人眼中，辣模做演員好多時不過係飾演一啲花瓶角色，只係對佢嚟講並非如此。出色嘅演技不僅令佢擺脫花瓶嘅命運，而憑住專業同認真嘅態度，更喺大學生電影節中，獲得最喜歡嘅新進演員殊榮，另外又喺MTV超級盛典中榮獲最具風格女演員，足證佢並非只憑優秀嘅外形，而獲得大家嘅留意，努力磨練出嚟嘅演技更係顯示出佢才情橫溢嘅一面。雖然佢成就不凡，外形又冷艷，但私底下嘅佢卻係一個熱情嘅人，事關佢經常喺個人微博中分享生活大小事，甚至一啲瘀爆嘅事亦唔介意同人分享，名副其實係位外冷內熱嘅火辣神族。
由於孟曉藝擁有冷艷外形，故此喺唔少人眼中，佢嘅性格必定係拒人於千里之外嘅一類。不過現實生活中嘅佢，不但經常喺微博上同粉絲互動，最重要係經常分享性感嘅生活照。如果想了解佢多啲，就要去佢個微博度睇吓喇！
網址：weibo.com/u/1914186102
出生地：北京
身 高：170cm
三 圍：35、24、36
撰文：魂