晨早起床清新開朗，特別係男人，一朝起身特別精神，唔通因為咁連性事都要揀晨早做？食串燒離不開豬牛羊雞肉，估唔到瀋陽一間燒烤專門店，竟出動性感美女做宣傳。男人貪新忘舊，睇完一本鹹書就會想買第二本，不過睇完唔好亂咁掉，因為鹹書有價，美國就有專門回收舊鹹書網店喇。
每個人都有自己嘅生理時鐘，故起床、進食及就寢時間都大有不同，咁大家成日都話男女大不同，咁雙方嘅生理時鐘有冇分別呢？日常生活就唔清楚，但係性生活就有所不同喇。英國情趣用品銷售網站Lovehoney，早前就男女雙方嘅床上生理時間做過一項調查，希望得知男人同女人邊一個時間最性飢渴。調查總共搵到約2,300名成年男女接受訪問，大家係咪以為男人咁鍾意夜生活，一定最想喺晚上做愛呢？事實上又唔係喎！最多男人（28%）喺早上6點至9點嘅時候有性需要。另外，最多女人（25%）喺晚上11點至凌晨2點有需要！同一時間，有一半男性認為自己慾火上升嘅時候比較穩定，至於36%女性就話自己出現性慾好多時都係由氣氛帶起。各位男士唔想犧牲睡眠時間「晚練」的話，記住多花心思搞氣氛以提早性事開幕時間喇！
家陣香港大街小巷都出現不少燒烤店，主要賣串燒食物，一串又一串燒到焦香又惹味嘅串燒令人食指大動，再配上一杯又一杯嘅生啤，簡直就係人生一大快事。正所謂食色性也，大家享受大杯酒大塊肉嘅時候，又有冇諗起肉感美女呢？見到性感美女又會唔會諗起串燒呢？不過點都好，搵美女做宣傳絕對係現代商家嘅大方向。早前，瀋陽一間專賣串燒嘅食店開張，宣傳方法唔係一貫嘅派傳單，而係搵嚟為數不少嘅妙齡女郎，換上性感三點式再加上一對天使翼到大街上高舉宣傳牌，上面寫住「吃燒烤，看嫩模，嗨到爆」，雖然唔知有幾多人真係會入店內食燒烤睇嫩模，但至少喺網絡又惹來一番熱烈討論。
以前要吸收成人知識，方法只有一個，就係睇鹹書！翻開一頁又一頁，欣賞裸體美女擺盡各種意淫姿態，相信係好多七、八十後朋友嘅快樂回憶。而為咗令大家再次回憶呢段歡樂嘅日子，英國一位叫做Dave嘅男人就銳意收集舊鹹書。Dave居於倫敦北部，最近就開設咗網站webuyanyporn.com，主要係收購舊鹹書以及舊嘅鹹濕漫畫。Dave表示咁做有利可圖，因為好多已屆中年而經濟不俗嘅男士對鹹書依然有興趣，將之收購返屋企回味兒時睇鹹書嘅樂趣。Dave話厚身嘅鹹書銷情最好，除咗多嘢睇，厚書仲能夠保留氣味，為買主提供視覺以外嘅味覺回憶。
撰文：賢