有人話人生係一個解決煩惱嘅過程，姑勿論認唔認同，其實走到最後時回顧一下，都大可一笑置之。好似有人遊埃及時玩露股，結果搞到一頭煙；又有人提倡裸體搞園藝，話咁樣可以親親大自然；亦有人講起球星時熱到要除晒啲衫。所以話人生千奇百怪乜都有，使乜太過認真呢？
人哋遊埃及影相留念，佢又係遊埃及影相紀念，因乜解究煩到一頭煙呢？咪就係呢位嚟自古巴嘅脫星Carmen De Luz自作孽囉！話說呢位現年31歲，喺2009年出道一年就引退，及至今年先至復出嘅脫星，本嚟好地地4月底去埃及遊覽。點知勁自戀自己個36吋躉嘅佢，騎住駱駝時突然玩露股兼畀同行友人影相，仲要擺埋上網畀人睇。結果惹嚟大量批評指佢侮辱當地文化，就連埃及當局都表示關注，話要調查相關行為有冇違法。佢為咗平息紛爭，先喺Twitter自辯冇違反觀光規定，又稱自己好愛埃及之餘，仲要拍片兼整埋阿拉伯文字幕對大家解釋事件。想出位嘅心大家都明白，只係唔該搵啲醒目啲嘅方法得唔得？
成日聽到乜乜日物物日，咁多唔同主題嘅日子叫人邊記得晒，試問大家知唔知5月2日係乜嘢日子？咪就係「世界裸體園藝日」（World Naked Gardening Day）囉！呢個定喺每年5月第一個星期六嘅特別日子，提倡透過裸體料理植物，享受人與地球合二為一嘅樂趣。雖然大家唔記得實屬正常，但英國曼徹斯特一個叫做「Hulme Community Garden Centre」嘅園藝中心就記得呢日，仲搵嚟幾個男女工作人員，搶先喺臉書上載幾張裸體工作相，等大家睇吓佢哋有幾身體力行剝晒光豬搞園藝。不過，好認真咁講，睇勻全世界好似得佢哋係咁做，可能下年要搵多啲人，尤其係靚女裸體搞園藝，有機會引起大家注意都未定。
裸體報新聞？好老套嘅嘢嚟喎！既然大家都覺得老套，點解呢位女報道員剝住衫報新聞，竟然引嚟大家熱議呢？咪就因為佢報緊嗰單新聞，係同超級足球巨星C朗有關囉！話說喺4月底，網上流傳一條新聞片，片中女主播Yuvi Pallares喺報道C朗同緋聞女友Daniella Chavez嘅新聞時，邊講邊剝衫，剝晒光豬後仲同C朗示愛，結果咪搞到網民起晒哄。有人話佢唔知醜，卻有更多人指佢行為大膽得嚟，身材絕對同C朗緋聞女友有得揮。查實呢位大膽妹係委國一個裸體體育新聞網站「Desnudando La Noticia」嘅主播，佢以前本嚟冇乜名氣，家陣藉抽C朗水即刻紅到發紫，真係全靠網民超激動嘅反應呀！
撰文：魂